Швеция ҳукумати Қуръон ва бошқа муқаддас китобларни ошкора ёқишни тақиқлаш имкониятини кўриб чиқмоқда. Ҳукумат вазиятни таҳлил қилиб, қонунга ўзгартириш киритиш зарур ёки йўқлиги ҳақида якуний қарорга келади, деб хабар берди EADaily.
Мамлакат Адлия вазири Гуннар Строммернинг сўзларига кўра, Қурбон ҳайити куни масжид олдида Қуръоннинг ошкора ёқилиши сабабли Швеция террорчилар ҳужумининг “бош нишони”га айланиб қолган.
“Биз Швецияда террорчилик жиноятини амалга оширишда гумонланиб ҳибсга олинганларни кўрдик. Германияда ҳам шу контекстда Швецияга қарши террорчилик жиноятларини тайёрлаётганликда гумонланиб, ҳибсга олишлар бўлди. Шунингдек, биз ўтган ҳафтада амалга оширилган Қуръоннинг ёқилиши ички хавфсизлигимиз учун янгидан янги таҳдидларни вужудга келтирганига амин бўлмоқдамиз”, — деган Строммер.
Аввалроқ Швецияда шу кунларда Қуръон ёқиш акциясини амалга ошириш учун яна иккита ариза топширилгани хабар берилганди.
Ўтган ҳафта ўтказилган шундай акция мусулмон оламида катта норозиликлар келтириб чиқарди.
Европа давлатларида Қуръоннинг ёқиб юборилиши
21 январь куни Расмус Палудан Туркиянинг Стокгольмдаги элчихонаси олдида Қуръонни ёқиб юборди. Шундан кейин Туркияда Швецияга қарши намойишлар бошланди. Мамлакатнинг Истанбулдаги Бош консуллигида оммавий акция бўлиб ўтди, унда Швеция байроғи ёқиб юборилди.
23 январь куни содир бўлган воқеалар фонида Туркия миллий мудофаа вазири Ҳулусий Акар Швеция ва Финляндия терроризмга қарши курашда Анқарага ёрдам беришни хоҳламаслигини билдирди. Айни пайтда мамлакатлар НАТОга киришда Туркиядан ёрдам кутмоқда.
23 январь Нидерландияда “Ватанпарвар европаликлар Ғарбнинг исломлашувига қарши” (ПЕГИДА) ҳаракати етакчиси Эдвин Вагенсвелд Гаагадаги Нидерландия Вакиллар палатаси биноси олдида Қуръон китобини омма олдида йиртиб, ёқиб юборди. У Расмус Палуданни қўллаб-қувватлаш учун ўтказилганини маълум қилди.
27 январь куни Расмус Палудан Копенгагендаги масжид олдида ҳам муқаддас китобни ёқиб юборди. Ҳолат юзасидан Дания элчиси Туркия ТИВга чақиртирилди.
30 январь куни даниялик сиёсатчи Россиянинг Даниядаги элчихонаси олдида яна Қуръонни ёқиб юборди. Рамзан Қодиров бунга муносабат билдирди.
Изоҳ (0)