Москва шарқидаги Белое озеро (Оқ кўл) ҳудудида номаълум шахс Қуръонни ёқиб юборди, полиция гумондорни қидирмоқда. Бу ҳақда “ТАСС” хабар берди.
Мазкур ҳолат юзасидан жиноят иши қўзғатилган. Тармоқ мониторинги пайтида ҳуқуқ-тартибот идоралари ходимлари Қуръонни таҳқирлаш акс этган видеолавҳани топган.
“Полиция ходимлари томонидан барча ҳолатларга аниқлик киритиш, гумонланувчи шахсни аниқлаш ва қўлга олишга қаратилган комплекс тезкор-қидирув тадбирлари ўтказилмоқда”, — дейилади хабарда.
Ҳодиса юз бергани тахмин қилинган ҳудудда масжид қурилиши режалаштирилганди. Кейинчалик шаҳар мери Сергей Собянин 2,5 минг квадрат метр майдонга эга кичик масжидни кўл ёнида эмас, балки “Косино” метро станцияси яқинида қурилишини айтди.
Чеченистон раҳбарининг муносабати
Чечен мутахассислари федерал хавфсизлик хизмати (ФХХ) ва Москва мерияси билан биргаликда Қуръон ёқиб юборилгани ҳақидаги видеонинг муаллифини аниқламоқда. Чеченистон раҳбари Рамзан Қодиров мазкур ҳодисани масжид қурилиши билан боғлиқ можаро ҳал қилинганидан кейинги провокация деб атади. У муқаддас китобни ёқиб юборган шахсни жазолашга ваъда берди.
Чеченистон раҳбари хавфсизлик кучлари ушбу видео муаллифини қидираётганини айтди.“
“Аллақачон текширувнинг биринчи натижаларига эгамиз. ФХХ мутахассислари ва раҳбарияти билан алоқадаман, улар тарқатилган видеонинг маълумот изини кузатмоқда. Яқин кунларда провокаторнинг шахси аниқланади, у муносиб жазога тортилади. Бу масала билан шуғулланяпман ва провокаторни қидириш тўхтатилмаслигига ваъда бераман”, — деди Қодиров.
Европа давлатларида Қуръоннинг ёқиб юборилиши
21 январь куни Расмус Палудан Туркиянинг Стокгольмдаги элчихонаси олдида Қуръонни ёқиб юборди. Шундан кейин Туркияда Швецияга қарши намойишлар бошланди. Мамлакатнинг Истанбулдаги Бош консуллигида оммавий акция бўлиб ўтди, унда Швеция байроғи ёқиб юборилди.
23 январь куни содир бўлган воқеалар фонида Туркия миллий мудофаа вазири Ҳулусий Акар Швеция ва Финляндия терроризмга қарши курашда Анқарага ёрдам беришни хоҳламаслигини билдирди. Айни пайтда мамлакатлар НАТОга киришда Туркиядан ёрдам кутмоқда.
23 январь Нидерландияда “Ватанпарвар европаликлар Ғарбнинг исломлашувига қарши” (ПЕГIDА) ҳаракати етакчиси Эдвин Вагенсвелд Гаагадаги Нидерландия Вакиллар палатаси биноси олдида Қуръон китобини омма олдида йиртиб, ёқиб юборди. У Расмус Палуданни қўллаб-қувватлаш учун ўтказилганини маълум қилди.
27 январь куни Расмус Палудан Копенгагендаги масжид олдида ҳам муқаддас китобни ёқиб юборди. Ҳолат юзасидан Дания элчиси Туркия ТИВга чақиртирилди.
30 январь куни Даниялик сиёсатчи Россиянинг Даниядаги элчихонаси олдида яна Қуръонни ёқиб юборди. Рамзан Қодиров бунга муносабат билдирди.
Изоҳ (0)