20 июлга ўтар кечаси юзлаб ироқликлар Бағдоддаги Швеция элчихонасига бостириб кириб, бинога ўт қўйди. Бу ҳақда Reuters манба ва гувоҳларга таяниб хабар бермоқда.
Ироқ полицияси намойишчиларни тарқатиш учун сув пуркагичлар ва электрошокерлардан фойдаланган, дейилади AFP хабарида.
Намойишни Ироқнинг нуфузли уламоси Муқтада ас-Садр тарафдорлари уюштирган. Бундай тартибсизликлар Швеция полицияси Ироқнинг Стокгольмдаги элчихонаси яқинида Қуръонни ёқиш акциясига рухсат берганидан кейин содир бўлди. Акция 20 июлга режалаштирилганди.
Reuters манбасига кўра, Швеция элчихонаси ходимларидан ҳеч бири жабрланмаган. Кейинроқ Швеция Ташқи ишлар вазирлиги буни тасдиқлади ва дипломатик ваколатхонага қилинган ҳужумни қоралади.
Ироқ Ташқи ишлар вазирлиги ҳам намойишчиларнинг ҳаракатларини қоралади, деб хабар берди France24. Агентликнинг билдиришича, хавфсизлик кучлари зиммасига ҳужум ҳолатларини ўрганиш, айбдорларни аниқлаш ва уларни жавобгарликка тортиш вазифаси юкланган.
Бу Бағдоддаги дипломатик миссия биносига биринчи ҳужум эмас: июнь ойи охирида Стокгольмда Қуръон ёқилишига жавобан бир неча намойишчилар Бағдоддаги элчихона дарвозасини бузиб, ҳовлига киришга муваффақ бўлганди. Полиция бинога етиб келгач, улар ҳудудни тарк этган.
28 июнь куни Стокгольмда ироқлик эркак Қуръонни ёқиб юборди. Бағдод Қуръоннинг ёқилишини қоралаб, “салбий” оқибатларидан огоҳлантирди ва бу акциянинг “сўз эркинлигига ҳеч қандай алоқаси йўқлигини” таъкидлади.
Швецияда Қуръоннинг ёқиб юборилиши юзасидан норозилик намойишлари бўлиб ўтди.
Изоҳ (0)