Швеция пойтахти Стокгольмда эронлик аёл Қуръонни ёқиб юборди. Бу ҳақда Anadolu хабар берди.
Маълум қилинишича, эронлик 47 ёшли Маржон Байрами муқаддас китобни ёқиб юбориш учун полициядан рухсат олган. У ҳуқуқ-тартибот идоралари ходимлари ҳимоясида Маларен кўли қирғоғида мангалда Қуръонни ёқиб юборган. Аёл “барча динларни йўқ қилиш” кераклигини айтган.
Қуръоннинг ёқиб юборилишига оид сўнгги маълумотлар
Январь ойида Стокгольмдаги Туркия элчихонаси олдида Қуръон ёқиб юборилганди. Акцияни ултраўнг ва исломга қарши “Қаттиқ курс” партиясининг даниялик-швед фаоли Расмус Палудан бошқарган.
Апрель ойида Швеция маъмурий суди мамлакат Ташқи ишлар вазирлиги томонидан Қуръон ёқиб юборилган намойишларга қўйилган тақиқни бекор қилган. Суд ўз қарорида йиғилишлар ва намойишлар ўтказиш эркинлиги конституциявий ҳимояланган ҳуқуқлар эканини келтирган.
Июнь ойида ироқлик муҳожир Стокгольмдаги бош масжид ёнида Қуръонни ёқиб юборганди.
20 июль куни Швеция полицияси Стокгольмдаги Ироқ элчихонаси олдида Қуръон ва Ироқ байроғи ёқиб юборилган норозилик намойишини ўтказишга рухсат берди.
Шундан сўнг юзлаб одамлар Швециянинг Бағдоддаги элчихонасига бостириб кириб, бинога ўт қўйган. Намойишчиларни тарқатиш учун Ироқ полицияси сув пуркагичлардан фойдаланган.
Ўз навбатида, Ироқ мамлакатдан Швеция элчисини ҳайдаган ва яъна муқаддас китоб ёқиб юборилса, дипломатик алоқаларни узишини билдирган.
Шундан сўнг, Ироқнинг Даниядаги элчихонаси олдида Қуръон ёқиб юборилган. Намойишчилар буни Швециянинг Бағдоддаги элчихонасига яқинда уюштирилган ҳужумга норозилик сифатида амалга оширганини айтган.
Европа Иттифоқи ташқи сиёсат хизмати раҳбари Жосеп Боррел бундай ҳаракатларни қоралаган. У бу ҳолат Европадаги кўплаб мусулмонларни ранжитганини айтган.
Боррел Қуръон ёки бошқа муқаддас деб ҳисобланган бошқа китобларни таҳқирлаш ҳақоратли, ҳурматсизлик ва очиқ провокация сифатида баҳоланишини таъкидлаган.
Изоҳ (0)