Швеция шаҳарларидан бирида эркак рухсат этилган митинг чоғида НАТО низомини ёқиб юборди. У аввалроқ диний матнни ёқиб юборишини айтганди. Бу ҳақда Aftonbladet хабар берди.
Эркак митинг ўтказиш учун ёзган аризасида диний матнни ёқиб юбормоқчи эканини кўрсатган. Кўпчилик Қуръоннинг навбатдаги ёқиб юборилишидан хавотирлангани фонида эркак Хелсингборгдаги намойишда альянсга мухолиф эканини айтиб, НАТО низомини ёқиб юборган.
Рухсат этилган митингда 200 га яқин одам қатнашган. Полиция маълумотларига кўра, митинг тартибсизликларсиз якунланган.
2023 йил январь ойида Даниянинг исломга қарши “Stram Kurs” (“Қаттиқ курс”) партиясини бошқараётган ўта ўнгчи сиёсатчи Расмус Палудан Стокгольмдаги Туркия элчихонаси яқинида мусулмонлар учун муқаддас китобни ёқиб юборганди.
Шундан кейин Туркия норозилик сифатида Швеция мудофаа вазирининг ташрифини бекор қилган. Президент Ражаб Тоййиб Эрдўғон эса мамлакатнинг НАТОга аъзо бўлиш ташаббусини қўллаб-қувватлашдан бош тортганди.
28 июнь куни Стокгольмда ироқлик эркак Қуръонни ёқиб юборди. Бағдод Қуръоннинг ёқилишини қоралаб, “салбий” оқибатларидан огоҳлантирди ва бу акциянинг “сўз эркинлигига ҳеч қандай алоқаси йўқлигини” таъкидлади. Туркия ҳодисани “исломга қарши ҳаракат” деб атади, Марокаш эса ўз элчисини мамлакатдан чақириб олишга қарор қилди. “Толибон” Қуръон ёқилишига жавобан Швециянинг Афғонистондаги муассасалари фаолиятини тақиқлади.
Европа давлатларида Қуръоннинг ёқиб юборилиши
21 январь куни Расмус Палудан Туркиянинг Стокгольмдаги элчихонаси олдида Қуръонни ёқиб юборди. Шундан кейин Туркияда Швецияга қарши намойишлар бошланди. Мамлакатнинг Истанбулдаги Бош консуллигида оммавий акция бўлиб ўтди, унда Швеция байроғи ёқиб юборилди.
23 январь куни содир бўлган воқеалар фонида Туркия миллий мудофаа вазири Ҳулусий Акар Швеция ва Финляндия терроризмга қарши курашда Анқарага ёрдам беришни хоҳламаслигини билдирди. Айни пайтда мамлакатлар НАТОга киришда Туркиядан ёрдам кутмоқда.
23 январь Нидерландияда “Ватанпарвар европаликлар Ғарбнинг исломлашувига қарши” (PEGIDА) ҳаракати етакчиси Эдвин Вагенсвелд Гаагадаги Нидерландия Вакиллар палатаси биноси олдида Қуръон китобини омма олдида йиртиб, ёқиб юборди. У Расмус Палуданни қўллаб-қувватлаш учун митинг ўтказилганини маълум қилди.
27 январь куни Расмус Палудан Копенгагендаги масжид олдида ҳам муқаддас китобни ёқиб юборди. Ҳолат юзасидан Дания элчиси Туркия ТИВга чақиртирилди.
30 январь куни даниялик сиёсатчи Россиянинг Даниядаги элчихонаси олдида яна Қуръонни ёқиб юборди. Рамзан Қодиров бунга муносабат билдирди.
Изоҳ (0)