8 июлга ўтар кечаси Германия жануби-ғарбидаги масжид олдида Қуръон нусхаси ёқиб юборилди, деб хабар бермоқда TRT Турк-Ислом иттифоқининг дин ишлари бўйича турк-мусулмонлар соябон гуруҳига (ДИTИБ) таяниб.
Воқеа Баден-Вюртемберг штатида жойлашган Маулбронн шаҳридаги Мимар Синан масжиди олдида содир бўлган. Ҳаракатланиб кетаётган машинадаги одамлар Қуръонни тахқирлаб, ёқиб юборган.
“Ҳодисадан сўнг масжидимиз кузатув камераларидаги тасвирларни кўздан кечирганимизда, масжид олдидаги марказий кўчада машинадан нимадир улоқтирилганини кўрдик. Бу ёқиб юборилган Қуръон бўлиб чиқди, у масжид эшиги олдига ташланган”, — деди масжидлар уюшмаси директори Усмон Адибелли.
Унинг таъкидлашича, уюшма мазкур ҳодиса юзасидан полицияга ариза билан мурожаат қилган.
“Масжид олдига яқинлашган автомобилнинг фаралари халал бергани сабаб биз давлат рақамини ёки ҳужумга алоқадор одамлар сонини била олмадик”, — деб тушунтирди Адибелли.
Воқеа Европанинг турли мамлакатларида Қуръон нусхаларининг ёқиб юборилиши ёки таҳқирланиши ортидан содир бўлди.
Мисол учун, 28 июнь куни Стокгольмда ироқлик эркак Қуръонни ёқиб юборди. Полиция сўз эркинлигини ҳимоя қилиш мақсадида акцияга рухсат берганини даъво қилди. Ироқдаги Швеция элчихонаси яқинида юзлаб ироқликлар норозилик билдирди, бир неча ўнлаб намойишчилар бинога бостириб киришга уринди.
Ироқ Ташқи ишлар вазирлиги Стокгольмда Қуръонни ёққан 37 ёшли қочқин Салван Момикани экстрадиция қилишга чақирди.
Ҳозирда Швеция ҳукумати Қуръон ва бошқа муқаддас китобларни ошкора ёқишни тақиқлаш имкониятини кўриб чиқмоқда. Ҳукумат вазиятни таҳлил қилиб, қонунга ўзгартириш киритиш зарур ёки йўқлиги ҳақида якуний қарорга келади.
Изоҳ (0)