Қозоғистоннинг Олмаота вилоятидаги масжидда 9 февраль куни ёнғин содир бўлди. Бу ҳақда “Закон.кз” хабар берди.
Вилоят Фавқулодда вазиятлар бошқармасига кўра, воқеа Қорасарой туманидаги Энбекши қишлоғида юз берган. Масжидда 50 квадрат метр майдонда мебел ва хўжалик жиҳозлари ёниб кетган.
“Чақирув жойига зудлик билан Олмаота вилояти ФВБнинг 14 нафар ходими ва тўртта техникаси юборилган. Энг яқин ўт ўчириш қисмигача бўлган масофа 22 километр эди. Кўрилган тезкор чоралар натижасида ёнғин қуршаб олинган ва 50 квадрат метр майдонда бартараф этилган”, дейилади хабарда.
Қурбонлар ва жароҳатланганлар йўқ. Ёнғин сабабини аниқлаш учун Олмаота вилояти Фавқулодда вазиятлар бошқармаси тадқиқот-синов ёнғин лабораторияси ва тергов бўлими ходимлари ҳодиса жойида ишлашмоқда.
2024 йил ноябрь ойида Чимкентдаги масжидда эркак намоз вақти сафдошини дўппослаганди. Эркакка сафдошининг баланд овозда дуо ўқиётгани ёқмаган. Можаро туфайли имом жамоат намозини тўхтатишга мажбур бўлган. Ҳодиса иштирокчилари полицияга ариза билан мурожаат қилган. Ўшанда Қозоғистон Мусулмонлари диний бошқармаси фуқароларни масжид қоидаларига риоя қилишга ва тоқатли бўлишга чақирди.
Изоҳ (0)