Халқаро ҳамширалар кунини нишонлаётган дунё, Барселонадаги «саёҳатчи қўлқоп», мансабдорларга қарши Илон Маск. 12 май суратлари
12 май, сешанба куни дунёнинг турли бурчакларида олинган энг қизиқарли суратлар жамланмасини тақдим этамиз.
Вашингтондаги Колумбия округида жойлашган Оқ уйда ташкил этилган матбуот анжуманида қўлини бигиз қилиб журналистлардан савол сўраётган мамлакат президенти Дональд Трамп.Фото: EPA
Сардоба сув омбори тўғонининг ғарбий девори 1 май куни ёрилиб кетган. NASA’нинг 8 майда олинган суратларида сув оқими Ўзбекистон ва Қозоғистоннинг айнан қаерида тўпланганини кўриш мумкин.Фото: NASA
Хитойнинг Ухань шаҳридаги Тунцзи касалхонасида Халқаро ҳамширалар куни муносабати билан ташкил этилган байрам тадбирида қучоқлашаётган ҳамширалар.Фото: Getty Images
Испаниянинг Малага шаҳрида қисман ёпилган Баньос дель Кармен туманида слэклайн спорт тури билан шуғулланаётган йигит.Фото: Getty Images
Малайзиянинг Петалинг-Жая шаҳридаги коронавирус туфайли ёпилган туманда яшовчи эркак етказиб бериш хизматидан овқат олиб қолмоқда.Фото: EPA
Лондондаги метро поездларида кетаётган аҳоли. Мамлакат бош вазири Борис Жонсон уйдан туриб ишлай олмаётганлар ишга қайтиши мумкинлигини билдирган.Фото: EPA
Француз Полинезиясининг Таити шаҳридаги Теаюпоо қирғоқларида шуғулланаётган сёрфер. 2024 йилда Парижда ўтказиладиган Олимпиада ўйинларида айнан ушбу жой сёрфинг бўйича мусобақаларни қабул қилади.Фото: Getty Images
Шри-Ланканинг Коломбо шаҳридаги шифохона олдида Халқаро ҳамширалар куни муносабати билан селфига тушаётган ходимлар.Фото: EPA
Дубай шаҳридаги Бурж-Ҳалифа осмонўпар биносига «Хайрия учун дунёдаги энг баланд қути» деб ёзилган. Ушбу шиорли кампания кам даромадли инсонларни озиқ-овқат билан таъминлашга қаратилган хайрия ишларига йўналтирилган.Фото: Getty Images
АҚШнинг Нью-Йорк шаҳрида коронавирус ҳақида маълумот берувчи кўргазма.Фото: Rex
Малайзиянинг Селаянг шаҳрида Халқаро ҳамширалар куни муносабати билан тиббиёт ходимлари тушган суратлар коллажи.Фото: Getty Images
Москва вилоятидаги «Крокус Экспо» кўргазма марказида вақтинча ташкил этилган шифохона. Унда мингдан ортиқ «койка» ўринлари, жумладан, 120 та реанимация жойи кўзда тутилган.Фото: «Москва»
Барселона шаҳрида ҳавода учиб юрган бир марталик тиббиёт қўлқопи.Фото: Reuters
АҚШнинг Калифорния штатидаги Фримонт заводида Tesla Модель 3 машинасидан чиқиб келаётган ходим. Илон Маск заводни қайта очиш орқали маҳаллий мансабдорларнинг чекловларига қаршиликни намоён этган.Фото: Reuters
Изоҳ (0)