«Бунёдкор» стадиони сиғими, олиб-сотарлар ва қалбакилаштириб бўлмас чипталар ҳақида стадион директори Воҳид Зокиров билан суҳбатда маълумот олган «Дарё» мухбири стадионда ногирон ва имконияти чекланганлар учун яратилган қулайликларга ҳам қизиқиб кўрди.

Воҳид Зокировнинг маълум қилишича, ногиронлар аравачасидаги имконияти чекланган мухлислар учун стадионда 40 та жой ажратилган.

«Ногиронлар аравачасидаги имконияти чекланганлар мухлислар ва уларни кузатиб келганлар учун стадионга кириш бепул. Фақатгина имконияти чекланган мухлис ҳақиқатан ҳам ногирон эканини тасдиқловчи ҳужжат билан келиши керак. Ҳеч кимни хафа қилиш ниятим йўқ, аммо шундай воқеа гувоҳи бўлганманки, соғ-саломат инсон ногиронлар аравачасига ўтириб, стадионга бепул киришга уринган. Мана шундай қоидабузарликларнинг олдини олиш мақсадида ҳужжат талаб этилади», — деди Зокир Воҳидов.

«Кўзи ожиз футбол мухлисларига 20 та бепул чипталар тақдим қилиш учун кўзи ожизлар жамиятидан бизга илтимос келиб тушган. Албатта, чипталарни тақдим қилишга розилик бердик. Яна бир бор таъкидлайман, ҳеч кимни хафа қилиш ниятида эмасман, бироқ ‘кўзи ожизлар қандай қилиб стадионда футбол кўра олади?’ деган савол билан уларга юзландим. Биринчидан, кўзи ожизлар эшитиш орқали майдонда футболчилар қайси томонга ҳаракатланишини билиб олар ва ўз онгида ўйин ҳолатини тасаввур қилар экан. Иккинчидан, уларнинг ён атфоридаги мухлислар ўйин ҳақида, жамоалар қайси томондан жой олганлиги ҳақида маълумот бериб туради», — деб юқоридаги воқеани таърифлаб берди Воҳид Зокиров.

«Бунёдкор» футбол клуби матбуот хизмати бошлиғи, таниқли шарҳловчи Мирзаҳаким Тўхтамирзаев ушбу воқеага қўшимча қилди.

«Кўзи ожизлар орасида халқ ҳофизи Оролмирзо Сафаров Ўзбекистон миллий терма жамоасининг энг ашаддий мухлисларидан бири. Бу инсон майдонга тушадиган жамоалар таркибини мендан ҳам яхши билади. Бундай инсонлар ўйинни ўзгача ҳиссиёт ва эшитиш орқали кузатиб боради», — деди Мирзаҳаким Тўхтамирзаев.