Ўзбекистон Суперкубогининг бўлиб ўтадиган санаси ва манзили аниқ бўлди 

Ўзбекистоннинг амалдаги чемпиони ҳамда мамлакат Кубоги соҳиби ўртасида ўтиши лозим бўлган Суперкубок санаси ва манзили аниқ бўлди. 

“Пахтакор” ва “Насаф” ўртасидаги Суперкубок баҳси 24 август куни Жиззахнинг “Сўғдиёна” стадионида бўлиб ўтади. Бу ҳақида ПФЛ расмий сайти маълум қилди. 

“Маълумот учун, мавсум аввалида ўтиши лозим бўлган Суперкубок ўйини ОФК Чемпионлар Лигаси тақвимига ўзгартириш киритгани ва бу “Насаф” режаларини ўзгартирганидан келиб чиқиб, кейинроққа қолдирилганди. Ўртада Ўзбекистон U-20 Осиё Кубогига мезбонлик қилди. Кейинроқ бу ёшларнинг мундиалдаги иштирокига уланиб кетди. 

Июнь ойида эса Ўзбекистон миллий терма жамоаси CAFA мусобақасида иштирок этади. Бу ФИФА кунларидан ташқари саналарни ҳам ўз ичига олди. Референдум арафасида эса Суперлиганинг 1 та тури кейинроқ муддатга қолдирилди. Мазкур сабабларни инобатга олиб, Лига Суперкубок учрашувини июлда эмас, августда ўтказишни мақсадга мувофиқ деб топди ва бу борада ҳар икки клуб билан келишиб олди. Сентябрдан бошлаб эса “Пахтакор” ва “Насаф” Чемпионлар Лигасида иштирок этади”, — дейилади ПФЛ баёнотида. 

Қайд этиб ўтиш жоиз, Суперлигада ҳам иккала жамоа ўйини U-20 ЖЧ—2023 сабаб қолдирилганди. 11-турдан ўрин олган “Насаф” — “Пахтакор” учрашуви 15 август куни бўлиб ўтади.