Суперлига 11-тури доирасидаги “Насаф” — “Пахтакор” ўйини 15 август куни бўлиб ўтади. Бу ҳақда ПФЛ матбуот хизмати маълум қилди.

Шунингдек, ушбу клублар ўртасидаги Ўзбекистон Суперкубоги учрашуви ҳам 28 июль ва 2 сентябрь оралиғида ўтказилиши қайд этилган. Мазкур муддат ичида ҳар икки клуб 9 тадан учрашувда иштирок этади. Шундан кейин жамоалар Осиё Чемпионлар Лигасидаги иштирокини бошлайди.

ПФЛ иккинчи давра тақвимини аниқ белгилашга тўсқинлик қилаётган омилга ҳам тўхталган.

Лига чемпионат тақвимини тўлиқ шакллантиришга аллқачон тайёр. Бунинг учун ОФК тезроқ август ойидан старт оладиган Чемпионлар Лигаси бўйича режаларига ойдинлик киритиб олиши керак. Сабаби мусобақада “Насаф” ва “Пахтакор”дан ташқари “ОКМК” ҳамда “Навбаҳор” жамоалари ҳам иштирок этади. Лига эса буни инобатга олиши лозим.

Аввалроқ “Пахтакор”нинг кўплаб футболчилари U-20 Жаҳон чемпионатига жалб қилингани боис Тошкент клуби Суперлига доирасидаги “Насаф”га қарши ўйинни бошқа кунга қолдиришни сўраб, мурожаат қилгани ва ПФЛ ушбу сўровни қабул қилгани маълум қилинганди.