Хонанда Жасур Умиров журналист Жасур Ҳамроевга берган интервьюсида ўзбек шоу-бизнесини жонлантириш бўйича таклифлари ҳамда бир неча йил олдин лицензиясидан айрилишига сабаб бўлган воқеа ҳақида сўзлаб берди.
Журналистнинг “Ўзбек шоу-бизнесини жонлантириш учун нима қилиш керак?”, деган саволига хонанда ҳазиломуз тарзда жавоб берди.
— Шоу-бизнесни жонлантириш учун мен маданият вазири бўлишим керак. Ўшанда жонланиши мумкин. Шоу-бизнесни қўлга олишим учун менга икки йил етади. Лекин буни фақат хаёл қиляпман, чунки биламан, бу иш менинг қўлимдан келмайди. Чунки эрталаб вақтли туриш мен учун ўлим. Вазир одам эса кам ухлаши керак. Озодбек Назарбековнинг санъатимиз учун қилаётган ишларига раҳмат дейман, бу гапларим ҳаммаси ҳазил, албатта, дейди хонанда.
Шунингдек, Жасур Умиров бир неча йил аввал лицензияси олиб қўйилишига сабаб бўлган воқеа ҳақида ҳам сўзлаб берди.
— Лицензиямни МХХ ходимининг тўйига бормаганим учун олиб қўйишган эди. Ўшанда “бораман, лекин касал ётибман”, деганман. Кейинроқ яна бир марта қўнғироқ қилишганида администраторим “Пулини берсанглар, чиқаркан”, деган. Шунда “бўлди, Жасур керакмас”, дейишган ва лицензиямни олиб қўйишган. Шундан кейин “запрет”га тушганман. Шунда беш ойга олишган эди лицензиямни. Энди олганимда яна беш ойга олиб қўйишган. Санъаткорнинг лицензиясини олишни нотўғри иш деб биламан. Мана ҳозир энди йўқолиб кетди бунақа нарсалар. Озодбек Назарбеков вазир бўлганидан кейин санъаткорлар тадбирга чиқсаям пул тўланадиган бўлди, дейди Жасур Умиров.
Интервью давомида хонанда болалиги ҳақидаги аввал ошкор қилинмаган маълумотни айтиб ўтди. Жасурнинг айтишича, болалигида у отасидан тандир ясаб сотишни ўрганган.
— Болалигимда тандир сотганмиз. Отам тандир ясашни ўргатган. Тандирдан яхши пул қоларди. У кунлар ҳалигача эсимда. Ўйин-кулги билан юриб тандир сотардик. Тирикчиликнинг айби йўқ, дейди хонанда.
Изоҳ (0)