Xonanda Jasur Umirov jurnalist Jasur Hamroyevga bergan intervyusida o‘zbek shou-biznesini jonlantirish bo‘yicha takliflari hamda bir necha yil oldin litsenziyasidan ayrilishiga sabab bo‘lgan voqea haqida so‘zlab berdi.
Jurnalistning “O‘zbek shou-biznesini jonlantirish uchun nima qilish kerak?”, degan savoliga xonanda hazilomuz tarzda javob berdi.
— Shou-biznesni jonlantirish uchun men madaniyat vaziri bo‘lishim kerak. O‘shanda jonlanishi mumkin. Shou-biznesni qo‘lga olishim uchun menga ikki yil yetadi. Lekin buni faqat xayol qilyapman, chunki bilaman, bu ish mening qo‘limdan kelmaydi. Chunki ertalab vaqtli turish men uchun o‘lim. Vazir odam esa kam uxlashi kerak. Ozodbek Nazarbekovning san’atimiz uchun qilayotgan ishlariga rahmat deyman, bu gaplarim hammasi hazil, albatta, deydi xonanda.
Shuningdek, Jasur Umirov bir necha yil avval litsenziyasi olib qo‘yilishiga sabab bo‘lgan voqea haqida ham so‘zlab berdi.
— Litsenziyamni MXX xodimining to‘yiga bormaganim uchun olib qo‘yishgan edi. O‘shanda “boraman, lekin kasal yotibman”, deganman. Keyinroq yana bir marta qo‘ng‘iroq qilishganida administratorim “Pulini bersanglar, chiqarkan”, degan. Shunda “bo‘ldi, Jasur kerakmas”, deyishgan va litsenziyamni olib qo‘yishgan. Shundan keyin “zapret”ga tushganman. Shunda besh oyga olishgan edi litsenziyamni. Endi olganimda yana besh oyga olib qo‘yishgan. San’atkorning litsenziyasini olishni noto‘g‘ri ish deb bilaman. Mana hozir endi yo‘qolib ketdi bunaqa narsalar. Ozodbek Nazarbekov vazir bo‘lganidan keyin san’atkorlar tadbirga chiqsayam pul to‘lanadigan bo‘ldi, deydi Jasur Umirov.
Intervyu davomida xonanda bolaligi haqidagi avval oshkor qilinmagan ma’lumotni aytib o‘tdi. Jasurning aytishicha, bolaligida u otasidan tandir yasab sotishni o‘rgangan.
— Bolaligimda tandir sotganmiz. Otam tandir yasashni o‘rgatgan. Tandirdan yaxshi pul qolardi. U kunlar haligacha esimda. O‘yin-kulgi bilan yurib tandir sotardik. Tirikchilikning aybi yo‘q, deydi xonanda.
Izoh (0)