Хонанда Жасур Умиров “Мирсодиқова билан“ YouTube каналига берган интервьюсида қамалишига туҳмат сабаб бўлгани, рафиқаси билан қандай танишгани ҳақида сўзлаб берди.
Хонанда икки йил аввал туҳмат сабаб қамалгани ҳақида сўзлаб берди.
— Менга туҳмат бўлган. Ўша қиз терговчига ҳам, суд залида ҳам айбим йўқлигини айтган, лекин негадир ишонишмаган, у қиз мени севиб қолган экан. Турмушга чиқмоқчи бўлиб, менга туҳмат қилган. Мен айбим бўлмагани учун қамалмайман, деб ўйлардим. Лекин у қизга ҳам кимдир ўргатдими. Менга турмушга чиқмоқчи бўлган. Ота-онам у қизга “Сенга уйланади ўғлим, аслида ҳақиқат қандай бўлган, суд залига бориб, ҳақиқатни айтиб бер”, дейишганидан кейин у ҳақиқатни гапириб берган. Лекин барибир қамалиб кетдим. Ота-онам ҳам бошида айбим йўқлигига ишонишмаган. Кейинчалик тушуниб етишган.
Ўз вақтида қизлар стадиондаги панжараларни бузиб чиқиб кетадиган даражада яхши кўрадиган санъаткор бўлганман. Ўзи санъаткорларнинг мухлисалари кўп бўларкан.
Менинг феъл-атворим шунақа: аёллардан уяламан. Учта аёлнинг орасига кириб қолсам, кўзига қаролмай жим ўтираман. Масалан, синглим жуда бадавлат оилаларнинг қизлари билан бирга ўқиган. Унинг дугоналари уйимизга келиб-кетиб юрган. Биронтаси билан гаплашмаганман ҳаттоки. Юзига ҳам қарамаганман. Қизларга зўравонлик қилиш хаёлимга ҳам келмаган. Чунки атрофимда шундоқ ҳам қизлар кўп бўлган. Мен у қизга уйланмаганман.
Жасур Умировнинг айтишича, у қамоқдан чиққанидан сўнг давлат тадбирларига таклиф қилинмай қўйган.
— Давлат тадбирларида ҳозирча чиқмаяпман. Кейинчалик балки чиқиб қоларман. Кимгадир инсоф бериб балки чиқиб қоларман. Умуман олганда, менга қизиқ ҳам эмас тадбирга чиқиш. Тўйларимда пул топиб юрсам бўлди.
Хонанда рафиқасининг кўнглини қандай олгани ҳақида гапирди.
— Рафиқамни ўзим топганман. У синглимнинг дугонаси эди. Аслида ҳеч кимни зўрламаганимни, менга туҳмат бўлганини батафсил тушунтирганман. Шунда қайнонам рафиқамга “Бошидан унча-мунча синовлар ўтибди, тобланибди, оила ҳам яхши экан, шунга тегасан”, деган. У мендан 14 ёш кичкина, жуда рашкчи. Агар клипларимда тушган қизлар билан телефон рақам алмашганимни билиб қолса, жанжал кўтаради. Лекин аёл кишининг рашк қилгани ҳам яхши.
Жасур Умиров қамоқда эсида қолган энг таъсирли воқеа ҳақида гапирди.
— Қамалишимни эшитганимда ҳам, қамоқда ўтирганимда ҳам ҳеч қачон йиғламаганман. Кўзимга ёш келмаган. Лекин бир марта “Мухлисингдан совға келди”, деб бир сумка нарса олиб кириб беришганида йиғлаганман. “Қандай бола эдинг-а, ўтиришингни қара?”, деганман ўзимга ўзим.
Хонанда ота бўлиш унга қандай таъсир кўрсатгани ҳақида гапирди.
— Ота бўлганимдан кейин уйга талпинадиган бўлиб қолдим. Олдинлари уйга келсам, бўғилиб кетаверардим. Ҳозир эса ўғлим Муҳаммад Халидни соғиниб уйга шошаман.
Изоҳ (0)