Хонанда Жасур Умиров «Сўғдиёна» газетасига интервью берди. У суҳбат давомида санъат хоббиси эмаслиги, кўпчилик унинг санъаткор бўлишига ишонмагани, «Жумагул» қўшиғининг яратилиш тарихи ва оддий оила қизига уйланмоқчи эканини айтиб ўтди.
«Эркаликларим ортда қолган»
— Хонандаликка иқтидорим борлигини ҳис қилганман. Қолаверса, бувим, тоғам санъатга қизиқишган, қонимизда бор. Қўшиқларимни ўзим ёзаман. Чунки мени йўналишимдаги қўшиқларни кўпчилик ёзиб бера олмайди. Консерваторияда ўқиган талаба яхши хонанда бўлолмаса ҳам ҳар ҳолда яхши тингловчи бўла олади. Санъат мен учун хобби эмас. Бу менинг касбим. Бу соҳани пул учун танламаганман. Ўзим хоҳлагандек хонанда бўлдим ва мухлислар ортира олдим, деб ўйлайман.Ёшлигимда эрка бўлганман. Дадам оғзимдан чиққанини муҳайё қиларди. Энди ёш бола эмасман. Эркаликларим ортда қолган. Ҳаётда қийинчилик кўрмаган одам ўрнини тополмайди. Ёшликда меҳнатда катта бўлганман. Отам бошида 8 йил менга ҳомийлик қилган. Ундан кейин дадамдан пул олмай қўйганман.
«Ҳеч кимга ёқмадинг дейишган»
— Йўналиш топишдан аввал уч йилча қийналганман. Суратга олган клипларимиз оммалашмаган. Акам «Бошқа иш қил, қўшиқларинг ҳам, ўзинг ҳам ҳеч кимга ёқмадинг», деганди. Шунча йил ўқиганман деб ўзимга-ўзим таваккал бир ашула ёзаман, дедим. «Биллура» қўшиғи мени халққа танитди. Аввалига ўзимга унчалик ёқмади. Гапирганимда овозим йўғон чиқди. Зафар Қодиров деган дўстим қўшиқни баланд овозда айтишим кераклигини маслаҳат берган. Шу услубда куйлашим одамлар эътиборини қозонди. Хит қўшиларимнинг аксарият шу тарзда айтилган.
« ‘Сендан хонанда чиқмайди’ деганлар ҳам бўлган»
— Ўзбекистон давлат консерваториясида ўқиётганимда дарсларга кўп бормасдим. Шундан устоз санъаткор Козим Қаюмов «Сендан хонанда чиқмайди», деганди. Ҳайдалмасдан ўқишни охиригача етказганим омадим бўлса керак. Устозимнинг ўргатганларини тез илиб ололмаганман. Ўқишга киргунимча мусиқий билимим йўқ эди. Шундан жаҳли чиққанди.
«Жумагул’ сирдарёлик қизга бағишланган»
— Бир йили Сирдарёдаги стадионда концерт бергандим. Ўша куни роса ёмјир ёғганди. Шунга қарамай, томошага келганлар тарқалмади. Қўшиқ айтаётиб, узоқдан қўриқлаш хизмати бир қизни ўтишга қўймаётганига кўзим тушди. Ниҳоят қиз дугонаси билан ёнимга келди. Қўлидаги айиқчани менга берди. Ўсмир ёшидаги чиройли қиз экан. Дастхат сўради. Исмини сўрадим. Дугонаси «Исми Жумагул, ўзи гапиролмайди», деб айтди. Жумагул исмини биринчи бор эшитишим эди. Дугонангга айт, унинг исмига, албатта, қўшиқ куйлайман, деб айтгандим. Биринчи ёзган қўшијим хит бўлди. Шу-шу ўзим қўшиқ ёзишни бошладим. Авваллари менга қўшиқ ёзиб беришарди. Лекин ўз ғояларимни қўшиб турардим. 30 та қўшиғимни ўзим ёзганман.
«Нечта машина ойнасини синдирганимни эслолмайман»
— Санъаткор бўлишнинг ўзи бир тарбия. Бизнинг соҳа ҳар кимни чархлаб қўя олади. Кўп одамлар билан мулоқотда бўласиз, кўп нарсани ўрганасиз. Санъаткор бўлмаганимда, балки жанжалкаш кўча боласи бўлармидим. Санъаткор бўлганим учун ким биландир жанжаллашишга уялиб тураман кўпинча. Лекин мени шундай деб ўйлашади. Йилдан йилга шўхликларим камайяпти.
Аммо ўзим билмаган ҳолда бировларга озор бериб қўяман. Нечта машина ойнасини синдирганимни саноғини билмайман. Жаҳлим чиққанида телефон ё телевизорни синдиришим бор гап. Шундай қилсам, жаҳлимдан тез тушаман.
«Судлашяпти дейишса, қизлар тилласини сотиб пул берган»
— Instagram’да саҳифа очиб бериш илтимоси билан бир одамга мурожаат қилгандим. Билсам, у хакер экан. Ўзим бу ишларга унча аралашмасдим. Гўёки мен қайсидир санъаткор билан жанжаллашиб судлашиб юрганман-у ва менга катта пул керак бўлган. Содда қизлар ишониб бисотидаги тилласини сотиб, олиб келиб беришган. 4 та қиздан камида 20 минг доллар олган.
«Севгисиз оддий оиланинг қизига уйланаман»
— Қиз қидиришга бўлган ҳаракатни тўхтатдим. Бошим тошга тегиб, шу фикрга келдим. Энди севгимни изламайман, у севги мени қидирсин. Севгисиз ҳам оила қуриш мумкин-ку. Тўғрисини айтсам, мен билган севишган жуфтликларнинг кўпи ҳаётда бахтли эмас. Оддий оиланинг қизига уйланишни хоҳлардим. Камгап бўлса, ундан ҳам яхши.
Мавзуга доир:
- Дилшод Раҳмонов санъатга қайтишига нима туртки бўлгани, бизнеси ва ноҳақ «запрет»га тушгани ҳақида (видео)
- Феруза Собитова турмуши бузилишига актрисалиги сабаб бўлгани ҳамда санъатни тарк этаётгани ҳақида (видео)
- «Бахтли кунларни яшаяпмиз». Шоҳруххон Асал Шодиеванинг ижод қилишига муносабати ҳамда фильмлардаги гонорари 5 минг долларга баҳолангани ҳақида (видео)
- Мавлуда Асалхўжаева отасини алдаб театр институтига ўқишга киргани, мактабда ўқитувчи бўлиб ишлагани ва Туркманистоннинг машҳур рок гуруҳида қўшиқ куйлагани ҳақида (видео)
Изоҳ (0)