Бугун Ўзбекистон миллий телерадиокомпаниясига қарашли бир қатор телеканаллар тузилмаси ва улардаги раҳбарлар таркиби ўзгарди.
Бу ҳақда “Daryo”нинг МТРКдаги манбаси хабар берди.
Унга кўра, президентнинг тегишли фармонига асосан, Ўзбекистон миллий телерадиокомпанияси тизимидаги ташкилотларни қайта ташкил қилиш дастури бўйича телеканаллар бир қатор бирлашмалар таркибига қўшилди.
Жумладан,
- "Ўзбекистон 24" ижодий бирлашмаси таркибига "Ўзбекистон 24", "Ўзбекистон", "Дунё бўйлаб" телеканаллари ва "Ўзбекистон 24" радиоканали;
- "Маърифат" ижодий бирлашмаси таркибига "Маданият ва маърифат", "Ўзбекистон тарихи", "Болажон" ва "Кинотеатр" телеканаллари;
- "Ёшлар" ижодий бирлашмасига "Ёшлар", "Наво" телеканаллари ва "Ёшлар" радиоканали;
- "Спорт" ижодий бирлашмаси таркибига "Спорт" ва "Футбол TV" телеканаллари ўтказилди.
"Ўзбекистон24" ижодий бирлашмасига Ҳайдар Ҳасанов, "Маърифат" ижодий бирлашмасига Воҳид Луқмонов, "Ёшлар" ижодий бирлмашмасига Ҳусниддин Эргашев, "Спорт" ижодий бирлашмасига эса Зоҳид Каримов 3 ойлик синов муддати билан вақтинча директор вазифасини бажарувчи бўлди.
Шунингдек, ижодий бирлашмалар таркибидаги телеканалларга 3 ойлик синов муддати билан ўринбосар вазифасини вақтинча бажарувчилартайинланди.
Жумладан, "Ўзбекистон 24" телеканалига Шунқор Чориев, "Маданият ва маърифат" телеканалига Ориф Аҳмедов, "Ўзбекистон" телеканалига Дилшод Файз, "Наво" телеканалига Насриддин Асриддинов, "Ўзбекистон тарихи" телеканалига Алишер Шоимов, "Футбол TV" телеканалига Дармон Иброҳимов директор ўринбосари бўлди.
"Маҳалла" телерадиоканали эса молиявий мустақил телеканал ҳисолангани учун Давлат бюджети маблағлари ҳисобидан давлат буюртмасини бажариш шарти билан лойиҳавий молиялаштириш тизимига ўтказилган. Мазкур телеканал директори сифатида Икром Чориев фаолият юритади.
Ўтган йилнинг декабрь ойида Ўзбекистон миллий телерадиокомпаниясига 2025 йил учун давлат бюджетидан 881 миллиард сўмдан ортиқ маблағ ажратилгани хабар берилганди. Бу 2023 йилга нисбатан 320 миллиард сўмга кўпроқ ҳисобланади.
Шундан 107 миллиард сўмдан кўпроқ маблағ футбол мусобақаларини ёритишга мослашган кўчма телевизион станциялар сотиб олиш учун ажратилади.
Изоҳ (0)