“2025 йил учун Ўзбекистон Республикасининг давлат бюджети тўғрисида”ги қонун 24 декабрь куни қабул қилинди.
Унга кўра, Ўзбекистон миллий телерадиокомпаниясига 881 миллиард сўмдан ортиқ маблағ ажратилган. Шундан 107 миллиард сўмдан кўпроқ маблағ футбол мусобақаларини ёритишга мослашган кўчма телевизион станциялар сотиб олиш учун ажратилади.
Бундан ташқари, “Ўзбекистон 24” ва “Маҳалла” телерадиоканалларини республика ҳудудида эфирга узатишни тўлиқ HD форматга ўтказиш харажатлари учун қариб 20 миллиард, объектларни лойиҳалаштириш, қуриш ва жиҳозлаш учун 15 миллиард ажратилган.
Маълумот учун, 2024 йил учун МТРКга давлат бюджетидан 559,9 млрд сўм, 2023 йилда 555,94 млрд сўм маблағ ажратилган.
2025 йилнинг 1 январидан Ўзбекистонда “Futbol TV” номи остида футбол мусобақаларини ёритишга мослашган канал фаолиятини бошлайди.
Журналист Даврон Файзиевнинг хабар беришича, канал ҳозирда фаолият олиб бораётган “Foreign Languages” канали тўлқинида ташкил этилади.
Бунгача 2017 йилдан 2022 йилга қадар “UzReport” телеканали қошида “Futbol TV” (хусусий телеканал) фаолият олиб борганди. 2022 йилда ҳеч қайси чемпионат трансляциясини сотиб олмаган канал ёпилиб, унинг ўрнида кўнгилочар канал ташкил этилганди.
2024 йил февраль ойида Абдурашид Жўрабоев Ўзбекистон Миллий телерадиокомпаниясига раис этиб тайинланди. Бунгача у бош вазир котибияти раҳбари лавозимида ишлаб келган.
Изоҳ (0)