Британияда парламент депутати пичоқлаб ўлдирилди. Қотиллик сайловчилар билан учрашувда содир этилди

Буюк Британия Консерватив партиясининг депутати Дэвид Эмесс сайловчилар билан учрашув чоғида бир неча марта пичоқланди. Ҳодиса Эссекс графлигида Ли-он-Си черковида юз берган, деб ёзади BBC News.

Эссекс полициясининг айтишича, шифокорлар икки соат давомида унинг ҳаётини сақлаб қолишга уринган, бироқ у касалхонада вафот этган. Депутатнинг ҳамкасблари Twitter’да унинг оила аъзолари ва яқинларига таъзия билдирди. Хусусан, мамлакат бош вазирининг ўринбосари Доминик Рааб Эмессни «буюк одам, яхши дўст ва ажойиб депутат» деб атади.

«Бутун қалбим билан унинг оиласига ва уни севганларга ҳамдардман», — деди Рааб.

Ўз навбатида Британия бош вазири Борис Жонсон ҳукмрон партия аъзосининг ўлдирилишидан ҳайратда қолганини айтди.

«Менимча, бу ҳаммамиз учун оғир зарба бўлди. Бизнинг фикри-хаёлимиз ҳозир унинг яқинлари, рафиқаси ва болаларида. Қолганини полицияга қўйиб бериб, уларга воқеа сабабларини текширишга имкон беришимиз керак», — таъкидлади Жонсон. Бош вазир ҳукумат етакчи сиёсатчилар учун хавфсизлик чораларини кучайтириши керакми, деган саволга жавоб бермади.

Эмесснинг ўлими муносабати билан ҳукумат раҳбари ва молия вазирининг қароргоҳлари жойлашган Даунинг-стритда Британия байроқлари туширилди. Марҳум депутатнинг ортидан унинг рафиқаси ва беш фарзанди қолган.

Қайд этилишича, депутатни 25 ёшли йигит пичоқлаган, гумонланувчи пичоқ билан ушланган. Ҳужумчининг шахси ва жиноятнинг эҳтимолий сабаблари ҳозирча ошкор қилинмаган. Шу билан бирга, полиция қотилнинг шериклари бўлмаган деб ҳисоблайди.

Daily Telegraph Буюк Британия хавфсизлик тузилмаларидаги манбаларига таяниб, хабар беришича гумонланувчи Сомали фуқароси. Гувоҳнинг айтишича, ҳибсга олиш пайтида у хотиржам бўлган ва полицияга бўйсунган.

Дэвид Эмесс 1983 йилдан буён Британия парламенти аъзоси эди. Мамлакат олдидаги хизматлари учун 2015 йилда унга рицар-бакалавр унвони берилган. Шунингдек, Эмесс диний католик эди, бу унинг сиёсий ва ижтимоий қарашларида акс этган. Тахминан, 40 йиллик хизматида у абортга қарши кураш ва ҳайвонларни асраш кампаниялари билан танилган, деб ёзади BBC News.

Эмесснинг ўлимидан беш йил аввал Британияда яна бир парламент аъзосининг ҳаётига қасд қилинганди. 2016 йилда Лейбористларнинг 41 ёшли депутати Жо Кокс Брестолл шаҳрида сайловчилар билан учрашувдан сўнг ўлдирилган.