Манчестер Қироллик суди ҳакамлар ҳайъати Честер касалхонасининг янги туғилган чақалоқларни парваришлаш бўлими 33 ёшли ҳамшираси Люси Летбини етти нафар чақалоқни ўлдирганликда айбдор деб топди. Бу ҳақда Associated Press ва BBC хабар берди.
Бундан ташқари Летби яна олти чақалоқни ўлдиришга уринишда айбланди. Ҳакамлар ҳайъати чақалоқларни ўлдиришга уриниш бўйича яна олтита айблов юзасидан ҳукм чиқара олмади. Прокурорлар суддан 28 кун муҳлат сўради, бу вақтда ушбу моддалар бўйича айблов қайта кўриб чиқиладими ёки йўқлиги ҳал қилинади.
Тергов маълумотларига кўра, Летби барча қотиллик ва қотилликка уринишларни бир йил ичида — 2015 йилнинг июнидан 2016 йилнинг июнигача содир этган. У хизмат вазифасини бажараётиб, болаларнинг қон томирларига шприц билан ҳаво юборган, ортиқча овқатлантирган ёки най орқали ошқозонига ҳаво юборган, буюрилмаган инсулин киритган. Баъзи ҳолларда ҳамширанинг ҳаракатлари болаларнинг соғлиғига таъсир қилган, ўлимга олиб келмаган. Унинг нима учун бундай қилгани ҳозирча номаълум, дея таъкидлади Associated Press.
CNN ёзишича, полиция Летбининг уйини тинтув қилиш чоғида унинг қайдномаларида қуйидаги ёзувларни топган: “Мен яшашга лойиқ эмасман. Мен уларни қасддан ўлдирдим, чунки уларга етарлича ғамхўрлик қила олмаяпман”.
Иккинчи ёзувда “Мен даҳшатли ёвуз одамман”, дея ёнига катта ҳарфлар билан “Мен ёвузман, буни мен қилдим” деб қўшиб қўйилган.
Ҳамширанинг ўзи судда айбини тан олмади. Унинг адвокати таъкидлашича, чақалоқлар соғлиғининг кескин ёмонлашиши ва ўлими табиий сабаблар ва бошқа омиллар, жумладан, касалхонада ходимларнинг етишмаслиги ёки болаларга етарли даражада ёрдам кўрсатилмагани билан боғлиқ бўлиши мумкин.
Полиция 2017 йил май ойида чақалоқларнинг ўлими бўйича тергов бошлаганди, 2020 йил ноябрь ойида Летбига нисбатан айблов эълон қилинди. Суд 21 август куни ҳамширага нисбатан ҳукм чиқариши керак.
Ҳамшира ишлаган бўлимнинг етакчи маслаҳатчиси BBC’га айтишича, шифохона расмийлари Летбига қўйилган айбловларни ўз вақтида текширмаган ва ҳамшира устидан шикоят қилган шифокорларнинг овозини ўчиришга уринган.
Буюк Британия ҳукумати Летбига ҳукм чиқарилиши биланоқ мустақил тергов ўтказишни буюрди.
Изоҳ (0)