Жиззах шаҳрида фуқарони АҚШга ишлашга юборишини айтиб, Жанубий Африкага юборган шахс қўлга олинди. Бу ҳақда Жиззах вилояти ИИБ хабар берди.
Қайд этилишича, Жиззах шаҳрининг “Хайробод” маҳалласида яшовчи И.М. ички ишлар органларига мурожаат қилиб, ўғли М.Т.ни Шароф Рашидов туманининг “Хайробод” маҳалласида истиқомат қилувчи А.Й. Америкага ишлашга юборишини айтиб, 14,3 минг доллар олгани, лекин фарзандини Жанубий Африкага жўнатганини билдирган.
Шунингдек, аризачи ўғли М.Т. Африкада чорасиз қолиб кетгани, ўз навбатида А.Й. ундан вазиятни ўнглаш учун яна 6,7 минг доллар талаб қилаётганини баён этган.
Мазкур мурожаат асосида тезкор тадбир ўтказилиб, 6,7 минг долларни олган А.Й. ушланган. Ҳолат юзасидан жиноят иши қўзғатилган.
АҚШга ноқонуний бориш
АҚШ—Мексика чегараси орқали Америкага киришга уринаётган Ўзбекистон фуқароларига 2023 йилнинг ноябрида огоҳлантириш эълон қилиниб, унда ноқонуний кираётган фуқаролар АҚШга қўйиб юборилмаслиги, иммиграция иши ҳал қилингунга қадар ҳибсда сақланиши маълум қилинганди.
Ўша йилнинг декабрида АҚШга ноқонуний йўллар билан кетган 119 нафар ўзбекистонлик ватанга қайтарилган эди. 2024 йил март ойида эса яна 74 нафар ўзбекистонлик олиб келинди.
АҚШнинг Ўзбекистондаги элчихонаси ноқонуний миграция хавфли ва серхаражат уриниш эканини билдириб, Ўзбекистон фуқароларини одамларни товар сифатида кўрадиган жиноий гуруҳлар ёлғон ваъдаларига ишониб, жабрдийда бўлишдан огоҳлантирди.
Изоҳ (0)