Мексика қирғоқларида 8 нафар хитойлик муҳожир жасадлари топилди. Бу ҳақда CNN нашри хабар берди.
Етти аёл ва бир эркакнинг жасади Сан-Франсиско-дел-Мардаги пляжда топилди. Ушбу пляж Оахака штатига қарашли.
Оахака прокуратурасининг маълум қилишича, муҳожирлар ўтган ҳафта пайшанба куни Гватемала чегараси яқинидаги Чиапас штати Тапачула шаҳридан АҚШга жўнаб кетган. Улар ўтирган кемани мексикаликлар бошқариб борган.
Муҳожирлар ҳалок бўлишига кеманинг тўнтарилиб кетиши сабаб бўлгани маълум қилинган. Унинг ичида бўлган бир нафар хитойлик омон қолган.
Прокуратура ҳодисани тергов қилиш учун федерал идоралар ва жасадларнинг шахсини аниқлаш учун Хитойнинг Мексикадаги элчихонаси билан ҳамкорликда ишлаётганини билдирган.
Охирги йилларда Мексикадан АҚШга ноқонуний кирган хитойлик муҳожирлар сони кескин ошди. АҚШ ҳукумати маълумотларига кўра, 2023 йилда Мексикадан ноқонуний равишда АҚШга ўтган 37,000 дан ортиқ хитойлик фуқаролар ҳуқуқ-тартибот идоралари томонидан ушланган.
Изоҳ (0)