Тошкент шаҳрида фуқароларни Европа давлатларига ноқонуний йўллар билан ишга юборишни ваъда қилган МЧЖ раҳбари ушланди, деб хабар беради Бош прокуратура ҳузуридаги департамент.
Қайд этилишича, департаментнинг Чилонзор туман бўлими ва ДХХ ходимлари ҳамкорлигида тезкор тадбир ўтказилган. Тадбирда “Ч.г” МЧЖ раҳбари Ғ.К. (муқаддам судланган) фуқаро Б.Р. ва бошқаларнинг ишончига кириб, уларга сохта сертификат ва диплом тайёрлаб бериш орқали Европа давлатларига ишга юборишни ваъда қилиб, эвазига Б.Р.дан 4,5 минг долларни олган вақтида ашёвий далиллар билан ушланган.
Терговга қадар текширув жараёнида, МЧЖ раҳбари Ғ.К. фуқаро У.Т. ва бошқаларни алдаб, уларни чет элга ишга юбориши эвазига 25,8 миллион сўмни фирибгарлик йўли билан қўлга киритгани, шунингдек, беш нафар фуқаронинг номига “H-W.” МЧЖда турли касбларга ўқигани тўғрисида сохта сертификатлар тайёрлаб қўйгани аниқланган.
Мазкур ҳолатлар юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
АҚШга ноқонуний бориш
АҚШ—Мексика чегараси орқали Америкага киришга уринаётган Ўзбекистон фуқароларига 2023 йилнинг ноябрида огоҳлантириш эълон қилиниб, унда ноқонуний кираётган фуқаролар АҚШга қўйиб юборилмаслиги, иммиграция иши ҳал қилингунга қадар ҳибсда сақланиши маълум қилинганди.
Ўша йилнинг декабрида АҚШга ноқонуний йўллар билан кетган 119 нафар ўзбекистонлик ватанга қайтарилган эди. 2024 йил март ойида эса яна 74 нафар ўзбекистонлик олиб келинди.
АҚШнинг Ўзбекистондаги элчихонаси ноқонуний миграция хавфли ва серхаражат уриниш эканини билдириб, Ўзбекистон фуқароларини одамларни товар сифатида кўрадиган жиноий гуруҳларнинг ёлғон ваъдаларига ишониб, жабрдийда бўлишдан огоҳлантирди.
Изоҳ (0)