Исроил полицияси 18 октябрь куни Шарқий Қуддусда янги хавфсизлик деворини қуришни бошлади. «Корреспондент.net» хабарига кўра, мазкур девор Жабель Мукабар араб мавзесини яҳудийларнинг Армон Ханацив даҳасидан ажратиши керак.
Маҳаллий маъмурият маълумотларига кўра, вақтинчалик деворнинг умумий узунлиги 300 метрни ташкли этиши мумкин. 18 октябрь куни полиция томонидан баландлиги 2,5 метр, кенглиги 2 метр бўлган дастлабки олти бетон блок жойлаштирилган.
Хабар беришларича, сўнгги бир неча кун давомида араблар мавзесидан қўшни даҳага қарата бир неча бор тошлар ва ичида аланга олувчи қоришмаси бор шиша идишлар улоқтирилган.
Бундан ташқари, Жабель Мукабарда истиқомат қилувчи уч киши 13 октябрь куни амалга оширилган ҳамда уч исроилликнинг ўлимига сабаб бўлган терактда қатнашган, ҳужум қилган шахслар хавфсизлик кучлари томонидан ўлдирилган.
Сўнгги бир неча ҳафтадан буён Исроилда, айниқса, Иордан дарёсининг Ғарбий соҳили ҳамда Шарқий Қуддусда тартибсизликлар ҳамда тўқнашувлар тўхтамаяпти.
Исроил ҳукумати маълумотларига кўра, октябрь бошидан бери мамлакатдан 30 дан ортиқ теракт юз берган, етти нафар исроиллик ва 40 дан ортиқ фаластинлик ҳалок бўлган.
Изоҳ (0)