Paynet компанияси Humo тўлов тизимини 65 миллион АҚШ долларга сотиб олди. Бу ҳақда Давлат активларини бошқариш агентлиги хабар қилди.
Қайд этилишича, “Миллий банклараро процессинг маркази” яъни Humo’нинг 100 фоиз давлат акцияларини сотиш бўйича очиқ савдолар ўтказилди. Унда олтита номзод қатнашишга таклиф қилинган. Улардан 3 нафари белгиланган муддатларда мажбуриятга эга бўлган таклифларни билдирган.
65 миллион АҚШ доллари миқдорида энг юқори харид баҳосини таклиф қилган Paynet АЖ кимошди савдосининг ғолиби деб топилди. “Миллий банклараро процессинг маркази” АЖ устав капиталидаги 100 фоиз давлат акциялар пакетини хусусийлаштириш бўйича келишувга эришилди.
Талабгор келгусида жамиятга тегишли Humo тўлов тизимини барқарор ва узлуксиз ишлашини таъминлашга қаратилган қўшимча тадбирларни амалга ошириш бўйича мажбуриятларни, шунингдек, тизим фойдаланувчиларининг конфиденсиал (шахсий ва банк) маълумотларини ҳимоя қилишни зиммасига олган.
Paynet – Ўзбекистон молиявий технологиялар соҳасида 18 йилдан буён фаолият юритаётган энг йирик тўлов операторларидан биридир. Мазкур тўлов тизими орқали 1 500 дан зиёд маҳсулот етказиб берувчи ва хизмат кўрсатувчиларга тўлаш имконияти яратилган ҳамда йилига 20 миллиондан зиёд фойдаланувчилар ушбу хизматлардан фойдаланиб келмоқда.
Humo тўлов тизими ҳақида
“Миллий банклараро процессинг маркази” 2018 йил сентябрь ойида президент қарори билан ташкил этилган. Humo тўлов тизими ўша пайтдаги ягона процессинг маркази — хусусий тузилма бўлган Uzcard дастурий таъминотидаги катта носозликдан сўнг пайдо бўлган. Ўша йили 15 сентябрида Ўзбекистонда ягона бўлган Узcард тўлов тизими қарийб 3 кунга ишдан чиққан эди. Бунинг натижасида деярли барча аҳоли пластик карталаридаги ўз пулларини ишлатиш имкониятини вақтинча йўқотган. 19 сентябрда эса президент Ўзбекистонда янги миллий тўлов тизими яратилиши ҳақида қарор қабул қилган.
Humo’нинг 100 фоиз давлат улушини сотиш президентнинг 2024 йил 19 апрелдаги қарорида кўзда тутилган эди. 2019 йилнинг ноябрь ойида президент қарори билан Марказий банк Ахборотлаштириш бош марказига тегишли бўлган Humo’нинг давлат улуши (100 фоиз) ДАБАга ўтказилган ва компания (МЧЖ) АЖга айлантирилган эди.
Изоҳ (0)