Ўзбекистонда 1 июндан Paynet орқали нақд пул ечиш хизмати синов тарзида ишга туширилади. Бу ҳақда Марказий банк матбуот хизмати хабар берди.
Мазкур хизматдан аҳоли UzPaynet кассалари орқали фойдаланишлари мумкин бўлади ҳамда синов муддати 2023 йилнинг декабрь ойигача давом этади.
“Тартибга солиш қумдони” рўйхатига қуйидаги маълумотлар киритилмоқда:
- “Тартибга солиш қумдони” иштирокчиси: UzPaynet МЧЖ (веб-сайти “Paynet.uz”);
- синовдан ўтказиладиган молиявий хизматнинг қисқача тавсифи: UzPaynet МЧЖнинг тўлов агентлик тармоғи орқали банк карталари сақловчиларига нақд пул бериш;
- UzPaynet МЧЖ кассалари орқали банк карталари сақловчиларига нақд пул беришнинг вақтинчалик тартиби тасдиқланган сана: 2023 йил 12 май;
- синовдан ўтказиш бошланадиган сана: 2023 йил 1 июнь;
- синовдан ўтказишни тугатиш санаси: 2023 йил 1 декабрь.
Май ўрталарида “Korzinka”нинг “Шедевр” филиалида виртуал касса орқали эксперимент тарзида нақд пул ечиш хизмати ишга туширилганди. Ҳозирда фақат Humo карталари орқали нақд пул ечиб олиш мумкин. Бунда комиссия миқдори 1 фоизни ташкил этади.
Шунингдек, нақд пул ечиб олишнинг минимал миқдори 50 минг сўмни, кунлик лимити эса 300 минг сўмни ташкил этади. Хизмат орқали супермаркетда товар сотиб олингандагина пул ечиб олиш мумкин.
Компания ҳақида
UzPaynet — Paynet тўлов тизимининг асосчиси ҳисобланади. У Ўзбекистон бозорида 2005 йилдан буён йирик тўлов ташкилотларидан бири сифатида фаолият юритиб келмоқда.
Компания Paynet тўлов тизими ишлаб чиқарувчиси ва савдо белгиси эгаси ҳисобланади. Ҳозирги кунда 390 дан ортиқ хизмат кўрсатувчи провайдерлар тўловларни тизим орқали қабул қилмоқда — мобил алоқа, интернет, уй-жой, суғурта, ва бошқалар.
Тизим орқали ҳар куни 1,3 миллиондан ортиқ тўловлар 25 минг тўловни қабул қилиш пункти ва мобил илова орқали амалга оширилади.
Изоҳ (0)