Давлат активларини бошқариш агентлиги (DABА) “Миллий банклараро процессинг маркази” АЖ (Humo тўлов тизими) устав капиталидаги давлат улушининг 100 фоизини оммавий савдолар орқали хусусийлаштиришни ташкил этиш бўйича профессионал консалтинг компаниясини танлаш бўйича танлов эълон қилди.
Humo’нинг 100 фоиз давлат улушини сотиш президентнинг 19 апрелдаги қарорида кўзда тутилган эди. 2019 йилнинг ноябрь ойида президент қарори билан Марказий банк Ахборотлаштириш бош марказига тегишли бўлган Humo’нинг давлат улуши (100 фоиз) DABАга ўтказилган ва компания (МЧЖ) АЖга айлантирилган эди.
21 май куни Истиқболли лойиҳалар миллий агентлиги томонидан жамиятнинг номинал қиймати 1000 сўм ва умумий қиймати 155,4 миллиард сўм (устав капитали) бўлган 155,448 миллион донадан ортиқ оддий акциялари чиқарилиши давлат рўйхатидан ўтказилган.
Сотиш жараёнлари “Миллий банклараро процессинг маркази” АЖнинг тармоқ ва индивидуал хусусиятларидан келиб чиқиб, Ўзбекистон қонунчилиги талаблари доирасида энг мақбул хорижий тажриба асосида ташкил этилиши лозим, — дейилади хабарда.
Миллий банклараро процессинг маркази 2018 йил сентябрь ойида президент қарори билан ташкил этилган.
- Humо тўлов тизими ўша пайтдаги ягона процессинг маркази — хусусий тузилма бўлган Uzcard дастурий таъминотидаги катта носозликдан сўнг пайдо бўлган.
- Ўша йили 15 сентябрида Ўзбекистонда ягона бўлган Uzcard тўлов тизими қарийб 3 кунга ишдан чиққан эди.
- Бунинг натижасида деярли барча аҳоли пластик карталаридаги ўз пулларини ишлатиш имкониятини вақтинча йўқотган.
- 19 сентябрда эса президент Ўзбекистонда янги миллий тўлов тизими яраталиши ҳақида қарор қабул қилган.
Изоҳ (0)