“Milliy banklararo prosessing markazi” (Humo) ustav kapitalidagi davlat ulushi to‘liq Davlat aktivlarini boshqarish agentligiga o‘tkaziladi. Bu haqda prezidentning 30-noyabrdagi qarorida belgilandi.
“Raqamli mahsulotlar (xizmatlar) iste’molchilari huquqlarini himoya qilish va raqamli texnologiyalar vositasida sodir etiladigan huquqbuzarliklarga qarshi kurashishni kuchaytirish choralari to‘g‘risida”gi prezident qaroriga ko‘ra, 2024-yil 1-iyuldan to‘lov tizimi operatorlari va to‘lov tashkilotlari faqat aksiyadorlik jamiyati shaklida tashkil etilishi va faoliyat ko‘rsatishi mumkin bo‘ladi.
To‘lov tizimi operatorlari va to‘lov tashkilotlari ustav kapitalining eng kam miqdori:
- 2024-yil 1-iyuldan — to‘lov tizimi operatorlari uchun 50 milliard so‘mni, to‘lov tashkilotlari uchun 10 milliard so‘mni;
- 2025-yil 1-iyuldan — to‘lov tashkilotlari uchun 20 milliard so‘mni tashkil etadi.
Shuningdek, Elektron tijoratni tartibga solish va rivojlantirish hamda lotereya tashkil etish va bukmekerlik faoliyatini tartibga solish funksiyalari Istiqbolli loyihalar milliy agentligiga o‘tkaziladi.
2023-yil iyulida Humo va Uzcard to‘lov tashkilotlarining integratsiyalashuvi yakunlanib, barcha tijorat banklarining bankomatlari ikkala to‘lov tizimining ham kartalarini qabul qilishni boshlagandi.
Izoh (0)