“Миллий банклараро просессинг маркази” (Humo) устав капиталидаги давлат улуши тўлиқ Давлат активларини бошқариш агентлигига ўтказилади. Бу ҳақда президентнинг 30 ноябрдаги қарорида белгиланди.
“Рақамли маҳсулотлар (хизматлар) истеъмолчилари ҳуқуқларини ҳимоя қилиш ва рақамли технологиялар воситасида содир этиладиган ҳуқуқбузарликларга қарши курашишни кучайтириш чоралари тўғрисида”ги президент қарорига кўра, 2024 йил 1 июлдан тўлов тизими операторлари ва тўлов ташкилотлари фақат акциядорлик жамияти шаклида ташкил этилиши ва фаолият кўрсатиши мумкин бўлади.
Тўлов тизими операторлари ва тўлов ташкилотлари устав капиталининг энг кам миқдори:
- 2024 йил 1 июлдан — тўлов тизими операторлари учун 50 миллиард сўмни, тўлов ташкилотлари учун 10 миллиард сўмни;
- 2025 йил 1 июлдан — тўлов ташкилотлари учун 20 миллиард сўмни ташкил этади.
Шунингдек, Электрон тижоратни тартибга солиш ва ривожлантириш ҳамда лотерея ташкил этиш ва букмекерлик фаолиятини тартибга солиш функциялари Истиқболли лойиҳалар миллий агентлигига ўтказилади.
2023 йил июлида Ҳумо ва Uzcard тўлов ташкилотларининг интеграциялашуви якунланиб, барча тижорат банкларининг банкоматлари иккала тўлов тизимининг ҳам карталарини қабул қилишни бошлаганди.
Изоҳ (0)