1939 йилда суратга олинган “Оз мамлакатига саёҳат” фильмида актриса Жуди Гарленд кийган қизил туфли Heritage Auctions ким ошди савдосига қўйилди. Бу ҳақда “Правила жизни” нашри хабар бермоқда.
Манбага кўра, пойабзалнинг нархи 3,5 миллион долларни ташкил этади. У Голливуд либослари дизайнери Гилберт Адриан томонидан ишлаб чиқилган.
Ким ошди савдосига қўйилишидан аввал, ялтироқ мунчоқлар билан безатилган пойабзал Лос-Анжелес, Нью Йорк, Лондон ва Токиодаги бир нечта кўргазмаларда намойиш этилиши режалаштирилган. Туфлининг турли давлатларга “саёҳати” жорий йилнинг декабрь ойига қадар давом этади.
Дороти номли пойабзал қимматбаҳо артефактдир. У Голливуд фильмлари тарихидаги энг муҳим реквизит саналади, — деди Heritage Auctions компаниясининг вице-президенти Жо Маддалена.
Ҳозирда мазкур қимматбаҳо туфли коллекциячи Майкл Шоуга тегишли. 2005 йилда пойабзални Миннесота штатидаги Жуди Гарленд музейига вақтинчалик бериб турган. Бироқ узоқ вақт ўтмай туфли музейдан ўғирлаб кетилган.
Пойабзал ўғриси Терри Жон Мартин бўлиб чиқди. Айнан у музей ойнасини болға билан уриб синдирган. Ўғри пойабзалларни мунчоқлар билан эмас, балки ҳақиқий рубинлар билан безатилган деб ўйлаган. Жиноятчи тез фурсатда топилди ва у қилмишини тан олди. Адвокатининг сўзларига кўра, у “Оз мамлакатига саёҳат” фильмини ҳеч қачон кўрмаган ва пойабзалнинг маданий аҳамияти ҳақида ҳам бехабар бўлган.
Фильмда мазкур туфли ёрдамида қаҳрамон Канзасдаги уйига қайта олар эди. Бунинг учун Дороти унинг пошнасини ерга уч марта уриши ва “Уйдан яхшироқ жой йўқ” иборасини такрорлаши керак эди.
Изоҳ (0)