Европа комиссияси Президенти Урсула фон дер Ляйеннинг “Ўзбекистонда Европа иқтисодиёти кунлар” бизнес-форумининг очилиш маросимида иштирокчиларга видеомурожаат йўллади.
Мурожаатда у сўнгги йилларда Ўзбекистон ва Европа илгари мисли кўрилмаган даражада бир-бирига яқинлашганини таъкидлади.
“Асрлар давомида Ўзбекистон глобал савдонинг ‘уриб турган юраги’ бўлиб келган. Европалик савдогарлар кийим-кечак ва кулолчилик буюмларини харид қилиш учун Самарқанд, Бухоро ва Хивага келишган.
Улар сизнинг ҳашаматли саройларингиз, мафтункор манзараларингиз ва ғоят ранг-баранг маданиятингиз ҳақидаги ҳикоялар билан қайтишган.
Бугун Ўзбекистон яна дунёга очилмоқчи. Сиз нафақат Осиёда, балки глобал савдо йўналишлари ва инвестиция оқимларида ҳам ўз марказий ўрнингизни қайтармоқчисиз.
Европа эса Ўзбекистоннинг минг йиллик тарихидаги ушбу янги бобда сизнинг ҳамкорингиз бўлишни истайди.
Сўнгги йилларда Ўзбекистон ва Европа илгари мисли кўрилмаган даражада бир-бирига яқинлашди. Ҳеч бўлмаганда учта мисол келтирмоқчиман:
Биринчиси — савдога тааллуқли. 2021 йилдан бошлаб биз ўзбек маҳсулотлари учун Европа бозорини очдик. Ўзбекистон экспорти, хусусан, тўқимачилик ва металлургия соҳасида жадал суръатлар билан ўсди.
Янада ўсиш учун улкан салоҳият мавжуд.
Иккинчиси – инвестициялар соҳасида. "Глобал дарвоза" дастуримиз орқали биз сизнинг дунё билан ўзаро боғлиқ бўлиш мақсадингизни қўллаб-қувватлаймиз. Халқаро шерикларимиз билан биргаликда Европадан Шарқий Осиёга энг қисқа ва хавфсиз йўналиш бўлган Транскаспий йўлагига 10 миллиард еврогача инвестиция киритяпмиз. У Европа ва Марказий Осиёни 15 кундан камроқ вақт ичида боғлашга имкон беради.
Шунингдек, мамлакатингизнинг энг чекка ҳудудларига энг замонавий рақамли алоқани етказиб бериш учун Ўзбекистонни сунъий йўлдош тармоғимизга улаш устида ишламоқдамиз.
Ўзбекистон қитъаларимиз чорраҳасида жойлашган ва глобал алоқаларимиз марказида бўлиши лозим.
Учинчи мисолим – биз стратегик соҳалардаги ҳамкорлигимизни кенгайтирмоқдамиз. Жорий йилнинг апрель ойида муҳим минералларни етказиб бериш занжири тўғрисида битим имзоладик.
Баъзи инвесторлар фақат хом ашё қазиб олишдан манфаатдор эканини биламиз, лекин биз ундай эмасмиз. Биз энг юқори стандартлар асосида маҳаллий аҳоли учун иш ўринлари ва қўшилган қийматга эга маҳаллий ишлаб чиқаришларни яратишни қўллаб-қувватламоқчимиз.
Чунки бу янада барқарор таъминот занжирини яратишнинг энг яхши усули ҳисобланади.
Ушбу иқтисодий форум компанияларимиз ўртасида янги алоқаларни ўрнатишга хизмат қилади, шунингдек, янги келишувларни янги ишбилармонлик имкониятларига айлантиради, деб умид қиламан.
Буларнинг барчаси фақат бошланиши. Тез орада Ўзбекистон ва Европа ўртасида инвестиция ва савдони янада кўпайтирадиган янги Кенгайтирилган шериклик ва ҳамкорлик тўғрисидаги битимни имзолаймиз", — деди Урсула фон дер Ляйен.
Шунингдек, у келгуси йили Самарқанд шаҳрида тарихда илк бор ўтказиладиган “Марказий Осиё - Европа Иттифоқи” саммитини сабрсизлик билан кутаётганини ҳам таъкидлади.
“Ўзбекистон ва Европа Иттифоқи ўртасида дипломатик муносабатлар ўрнатилганининг 30 йиллиги нишонланаётган шу пайтда бир нарсага аминман: шериклигимизнинг энг яхши кунлари ҳали олдинда!
Хуллас, барчангизга Тошкент шаҳрига ташриф хайрли бўлишини тилайман”, деди у.
Изоҳ (0)