Сафар ёқимли ва самарали таассуротларга бой бўлиши учун ташкилий масалалар олдиндан ўйлаб қўйилиши керак.
Марказий банкнинг Finlit лойиҳаси харажатларни қисқартириш ва саёҳатдан олдин қандай вазиятларга тайёр бўлиш борасида 10 та молиявий маслаҳат тақдим этди.
Тўловларни амалга ошириш имкониятларини олдиндан ўрганиб чиқиш
Кўпчилик машҳур сайёҳлик ўлкаларида карта орқали тўловларни эркин амалга ошириш ёки банкоматдан пул ечиб олиш мумкин.Аммо айрим мамлакатларда саёҳат вақтида қийинчиликлар пайдо бўлади. Мисол учун, валюта айирбошлаш фақат банк офислари орқали амалга оширилиши ёки маҳаллий дўконлар банкоматлар ва тўлов терминаллари билан етарлича таъминланмаган бўлиши мумкин.
Шунингдек, саёҳат амалга ошириладиган кунлар ўша давлатнинг миллий байрам саналарига тўғри келмаслигига амин бўлиш зарур, чунки байрам кунлари савдо нуқталари ёки банк офислари ишламаслиги мумкин.
Валюта курсларини солиштириш
Баъзи ҳолларда, жўнашдан олдин сўмни евро ёки долларга алмаштириш, уларни жойида ўша мамлакатнинг миллий валютасига алмаштириш фойдалидир.Шунингдек, маҳаллий банклардан борилаётган мамлакат валютасини сотиб олиш имкони бор ёки йўқлигини текшириб кўриш фойдали.
Пулларни нақдлаштириш
Саёҳат вақтида пулни икки хил кўринишда – нақд ва банк пластик картасида сақлаш мақсадга мувофиқ.Кичкина ва кутилмаган харажатлар учун кичик миқдордаги нақд валюталарни (масалан, чойчақа учун 1-2 долларлик банкноталарни) олиб юриш тавсия этилади.
Маҳаллий дўконларда товарлар нархини таққослаш учун валюта конвертасиясини амалга оширувчи мобил иловаларни ҳам ҳар эҳтимолга қарши ўрнатиб олиш манфаатли бўлади.
Банкоматларнинг жойлашув жойи тўғрисида ва улардан фойдаланиш қанчалик хавфсиз эканини билиб олиш
Google Maps ёки махсус мобил иловалардан фойдаланган ҳолда яшаш жойи яқинида банкоматлар мавжудлигини аниқлаш мумкин.Хавфсизлик нуқтаи назаридан банк филиали, меҳмонхона ёки савдо марказининг ҳимояланган ҳудудида жойлашган банкоматдан фойдаланиш мақсадга мувофиқ.
Комиссион тўловлар миқдорини аниқлаш
Хориждаги фойдаланмоқчи бўлган банкоматлар нақд пул ечиб олиш ва харидлар учун тўловларни амалга оширишда қанча миқдорда комиссия олишига қизиқиш билдириш керак.Буни банкнинг Call-марказига қўнғироқ қилиш орқали ҳам амалга ошириш мумкин. Айрим банклар қулай курслар бўйича харидлар учун тўловларни амалга ошириш ёки чет элда картадан комиссиясиз нақд пул ечиб олиш имконини берувчи банк карталарни очишни таклиф қилади.
Шунингдек, карта бўйича амалга ошириладиган операциялар сони ёки пул миқдори бўйича чекловлар мавжудлигини олдиндан билиб олиш маъқул.
Бир нечта халқаро банк карталарини очиш
Баъзида тўлов тизимларида техник носозликлар юзага келади ва бу чет элда маблағсиз қолишга ҳам сабаб бўлиши мумкин. Борилаётган давлатда қайси халқаро тўлов тизими энг оммабоп эканини олдиндан аниқлаш мақсадга мувофиқ.Шунингдек, кутилмаган вазиятларда қариндошлар ва яқинлар картага пул ўтказмаларини амалга оширишлари учун уларга карта маълумотларини қолдириш ҳам кичик бир маслаҳат.
Банк мобил иловасини юклаб олиш
Банкнинг мобил иловасини смартфонга ўрнатиш ҳамда банкнинг алоқа рақамини сақлаб қўйиш ёддан чиқмасин.Мобил илова орқали картадаги маблағларни мониторинг қилиш, картадан картага тўловларни амалга ошириш ёки бўлмаса саёҳат давомида кредит, интернет, коммунал хизматлар ва бошқалар учун тўловларни амалга ошириш мумкин.
Бундан ташқари, тўсатдан банк картаси йўқолганда ёки ўғирланганда мобил илова уни дарҳол блоклаш имкониятини ҳам тақдим этади.
Мобил операторининг роуминг тарифларини билиб олиш
Агар таътил пайтида ҳам ишласангиз, харажатларнинг катта қисми алоқа ва интернет хизматлари учун тўғри келиши мумкин.Уяли алоқа оператори тарифларини ёки саёҳат қилинадиган мамлакатда амал қилувчи алоқа операторининг SIM-картасини олиш шартларини кўриб чиқиш маслаҳат берилади. Чунки маҳаллий интернетдан фойдаланиш бир мунча арзон ва фойдали бўлиши мумкин.
Диққатга сазовор жойларни томоша қилиш учун туристик карталар ва чегирмаларни қидириш
Саёҳат қилиш учун диққатга сазовор жойлар рўйхати тузилганидан сўнг, улар учун чегирма ва имтиёзлар мавжуд ёки йўқлигини текшириб кўриш фойдали. Аксарият музейлар талабалар учун чегирмаларни таклиф қилади.Кўпгина жойларда музейларга кириш учун ягона чипта ва туристик карталар сотилади. Улар ёрдамида асосий диққатга сазовор жойларни кўриш ва шаҳар бўйлаб ҳаракатланиш бирмунча арзонроқ бўлади.
Бу орқали узун навбатларда туришдан ҳам халос бўлиш мумкин. Диққатга сазовор жойларнинг расмий сайти орқали уларга кириш учун тўловсиз кунлар (соатлар) бор ёки йўқлигини билиб олиш ҳам мақсадга мувофиқ.
Харажатларни тўғри тақсимлаш
Кўпинча дам олишга борилганда ҳар хил вазиятларни инобатга олган ҳолда иложи борича кўпроқ пул олиб кетишга ҳаракат қилинади. Саёҳат давомида оила аъзоларига совғалар олиш, ресторандан қўшимча таом олиш, кўнгилочар ўйинларда иштирок этиш ва шу каби кутилмаган харажатлар кўпайиб кетади.Натижада таътилдан қайтилгандан сўнг маблағ камлиги сабабли харажатларни амалга оширишда қийинчиликлар юзага келади. Шунинг учун, сафарга кетишдан олдин пулни бир қисмини уйда қолдириш лозим.
Аввалроқ Марказий банк қандай қилиб пул тежаб, яхши яшаш мумкинлиги тўғрисида тавсиялар берган эди.
Изоҳ (0)