Ijtimoiy tarmoqlarda talabalar uchun yo‘lovchi poyezdlariga chegirma e’lon qilingani, lekin temiryo‘l kassalarida va ilovada chiptalar qolmagani haqida xabarlar tarqaldi. “O‘ztemiryo‘lyo‘lovchi” bunga munosabat bildirdi.
Unda qayd etilishicha, hozirgi kunda Toshkent shahridagi OTMlarda tahsil olayotgan talabalarga qulaylik yaratish maqsadida sayyor kassalar tashkil etilgan. Ushbu sayyor kassalar orqali talabalar bemalol o‘z yashash manzillariga qatnovchi yo‘lovchi poyezdlari uchun chiptalarni xarid qilishi mumkin. Shu bilan birga, yo‘lovchi poyezdlariga qo‘shimcha vagonlar ulanib, yangi poyezdlar qatnovi yo‘lga qo‘yilmoqda.
Shu o‘rinda 50 foiz chegirma bilan talabalar tomonidan xarid qilingan chiptalar bo‘yicha kunlik ma’lumotlar e’lon qilinmoqda. 19-dekabr 8:00 holatiga ko‘ra, talabalar tomonidan elektron tarzda 15 465 ta, chiptaxonalardan 3 539 ta, jami 19 004 ta chipta 50 foiz chegirma bilan xarid qilingan.
“Toshkent mintaqaviy temir yo‘l uzeli” UK matbuot xizmatining qayd etishicha, bayram arafasi hamda ta’tilga oz qolganli sababli aholining hamda talabalarning temir yo‘l transporti xizmatiga bo‘lgan talablari ortmoqda va buning oqibatida ilovalardan elektron chiptalarni xarid qilish keskin ko‘paymoqda.
Sayyor kassalar quyidagi manzillarda tashkil etilgan:
- O‘zbekiston milliy universitetining o‘zbek filologiyasi fakulteti binosi 1-qavati;
- Toshkent davlat iqtisodiyot universiteti A-binosida;
- Toshkent davlat Agrar universiteti binosida.
-0Vm8aEAa.jpg)
Oliy taʼlim muassasalarida tahsil olayotgan talabalarga qishki taʼtil mobaynida mahalliy yo‘nalishdagi qatnovlar uchun 23-dekabrdan 2025-yil 10-yanvarga qadar 50 foiz chegirmalar eʼlon qilingandi. Chiptalarni sotib olish uchun talabalar pasport bilan temir yo‘l kassalariga tashrif buyurishi yoki elektron tarzda chipta xarid qilishda eticket.railway.uz saytidan foydalanishlari mumkin.
Oliy taʼlim tashkilotlari talabalari, texnikum, kollej, kasb-hunar maktabi va akademik litseylar o‘quvchilariga 2024/25-o‘quv yili uchun beriladigan qishki taʼtil 2024-yilning 25-dekabridan boshlanadi va 2025-yilning 7-yanvariga qadar (shu kuni ham) davom etadi.
Izoh (0)