Ўзбекистонлик чарм қўлқоп устаси Муроджон Аҳмадалиев WBA раҳбариятидан ушбу вазнда мутлақ жаҳон чемпиони Наоя Иноуэга қарши жанг беришларини талаб қилмоқда.
“Биз барча камарлар учун жанг ўтказишни истаймиз. WBA бунинг учун ўз томонидан барча зарурий чораларни қўллашини сўраймиз. Тушунамиз, ташкилот Иноуэнинг машҳурлигидан келиб чиқиб, унинг камарларини олиб қўйгиси келмаяпти. Лекин истак сабаб қоидаларга қарши бормаслик керак”, деди Муроджоннинг менежери Вадим Корнилов Boxingscene нашрига берган интервьюсида.
WBA ташкилоти президенти Хилберто Мендосанинг хабар беришича, WBA Иноуэ 24 январь куни австралиялик Сем Гудманга қарши жангини ўтказиб олганидан кейин мажбурий равишда Муроджон Аҳмадалиевдан чемпионлик камарларини ҳимоя қилади.
“Иноуэ ва унинг жамоасида Гудманга қарши жангдан кейин якуний қарор қабул қилиш учун 10 кун муҳлат бўлади. Шу муддат ичида Наоянинг жамоаси Аҳмадалиевнинг жамоаси билан ўзаро жанг бўйича келишиб олишлари лозим”, деди Мендоса.
Аҳмадалиевнинг юристи, яъни ҳуқуқшунос-адвокати Пет Инглиш Муроджон Аҳмадалиев номидан WBA ташклотига мактуб жўнатди.
“Бизга ваъда беришганди, лекин бу ўз вақтида бажарилмади. Жанг белгилаш бўйича резоляция бор эди. Биз ҳурмат билан, лекин қатъи равишда WBA’дан имкон қадар тезроқ Иноуэга қарши жангни белгилашларини талаб қиламиз. Биз Наоянинг Гудмандан кейин яна бир ихтиёрий ҳимоя жанги ўтказишига мутлақо қаршимиз. Японияликнинг ҳимоя жанги фурсати аллақачон келган ва у мажбуриятларни бажариши шарт”, дейилади Инглиш ёзган мактубда.
Маълумот учун, Муроджон Аҳмадалиев 14 декабрь куни тунда Монте-Карлода ташкил этилган профессионал бокс оқшомида мексикалик Рикардо Эспинозани 3-раунддаёқ нокаутга учратиб, вақтинчалик WBA чемпионига айланган эди.
Изоҳ (0)