Биринчи ярим енгил вазнда собиқ жаҳон чемпиони, WBA камари учун расмий даъвогар Муроджон Аҳмадалиев 14 декабрь куни жанг қилиши маълум бўлди.
Ўзбекистонлик чарм қўлқоп устаси вақтинчалик WBA камари учун жанг ўтказади. Муроджон Аҳмадалиев (12-1, 9 КО) 14 декабрь куни Монте-Карло шаҳрида Matchroom промоутерлик компанияси томонидан ташкил этилаётган профессионал бокс оқшомининг марказий жангида рингга кўтарилади.
Ўша куни 29 ёшли Аҳмадалиев мексикалик 27 ёшли Рикардо Эспиноза Франкога қарши рингга кўтарилади.
Муроджон Аҳмадалиев ушбу жанг ҳақида фикр билдирди.
“Ишга қайтганимдан хурсандман. Афтидан, бу P4P юлдузи, яъни Иноуэ ҳали катта чақирувларга тайёр эмас экан. Мендан қочишда давом этаверсин. Мен барибир ўзимга тегишли нарсани қўлга киритаман. Муроджонни кутинг, декабрь анча қайноқ бўлади”, деди 29 ёшли чарм қўлқоп устаси.
Аввалроқ Промоутер Боб Арум япониялик боксчи Наоя Иноуэнинг кейинги иккита жанги кимларга қарши бўлишини ва унинг режаларида ўзбекистонлик боксчи Муроджон Аҳмадалиев йўқ эканини маълум қилганди.
Маълумот учун, Аҳмадалиев шу вақтга қадар профессионал боксда 13 марта рингга кўтарилиб, жангларининг 12 тасида рақибларини мағлубиятга учратган, 1 та жангда эса имкониятни бой берган. Рикардо Эспиноза эса 34 марта рингга кўтарилиб, 30 та жангда ғалаба қозонган, 4 та баҳсда мағлубиятга учраган.
Изоҳ (0)