Супер ярим ўрта вазн тоифасида собиқ WBA чемпиони Исроил Мадримов иккинчи энг енгил вазнда собиқ жаҳон чемпиони Муроджон Аҳмадалиев ҳамда амалдаги чемпион Наоя Иноуэ жанги ҳақида фикр билдирди. Бу ҳақида Ўзбекистон профессионал бокс ассоциацияси матбуот хизмати маълум қилди.
“Иноуэ қочяпти. У билади, бу вазнда Муроджон энг қийин рақиб ва биз кўриб турибмиз-ки, Муроджон Аҳмадалиев уни бемалол юта олади. Шу боисдан ҳам у бошқа рақибларни танлаяпти. Жангдан очиқчасига қочяпти, десак ҳам бўлади. Чунки камар ҳозир унда. Вазият қандай бўлишини энди кўрамиз.
Муроджон Аҳмадалиев яна ўз мавқеини тиклаб, Ўзбекистонга камарларни олиб келишига ишонамиз. Бу бир оз кейинроқ бўлиши мумкин. Сабаби, Иноуэ қочяпти. Қачонки, Наоя кетмасдан, барча камарларини ҳимоя қилса, Муроджон Аҳмадалиев ундан барча титулларини тортиб олиши мумкин”, — деди Исроил Мадримов.
Аввалроқ, Matchroom промоутерлик компанияси раҳбари Эдди Ҳирн WBA’нинг Наоя Иноуэ ва Муроджон Аҳмадалиев жанги учун яна бир бор буйруқ бергани ҳақида айтиб ўтганди.
Маълумот учун, 31 ёшли япониялик Наоя Иноуэ айни пайтда иккинчи энг енгил вазн тоифасида WBA, WBC, WBO ҳамда IBF камарлари соҳиби ҳисобланади. Муроджон Аҳмадалиев эса унинг WBA камари учун мажбурий даъвогар бўлиб турибди.
Аҳмадалиев 2023 йилнинг декабрь ойида Кевин Гонсалесга қарши жанг қилганди. Қарама-қаршиликнинг 8-раундида ўзбекистонлик бокчи рақибини техник нокаутга учратиб, ғалаба қозонган эди.
Наоя 9 сентябрь куни мутлақ жаҳон чемпионлиги унвонини ҳимоя қилди. Токиода бўлиб ўтган бокс оқшомида япониялик спортчи Ти Жей Доэнига қарши жанг қилиб, еттинчи раундда уни нокаутга учратди. Иноуэнинг зарбасидан сўнг Доэни жангни давом эттиролмаслиги маълум бўлди.
Изоҳ (0)