Промоутер Боб Арум япониялик боксчи Наоя Иноуэнинг кейинги иккита жанги кимларга қарши бўлишини маълум қилди. Унинг режаларида ўзбекистонлик боксчи Муроджон Аҳмадалиев йўқ.
Наоя кейинги жангини IBF йўналишида расмий даъвогар 25 ёшли австралиялик Сем Гудменга (19-0, 8 КО) қарши ўтказади. Жанг 24 декабрь куни Токиода бўлиб ўтиши кўзда тутилган.
2025 йилнинг иккинчи ярмида Иноуэ WBC чемпиони Жунто Накатанига (28-0, 21 КО) қарши рингга кўтарилади. Жанг АҚШда бўлиб ўтади.
26 ёшли Накатани айни вақтда The Ring талқинига кўра, P4P рейтингида 9-ўринда бормоқда. У Иноуэ билан жанг қилиш учун вазнини кўтаришга тайёрлигини билдирган.
Наоя кеча, 3 сентябрь куни мутлақ жаҳон чемпионлиги унвонини ҳимоя қилганди. Токиода бўлиб ўтган бокс оқшомида япониялик спортчи Ти Жей Доэнига қарши жанг қилиб, еттинчи раундда уни нокаутга учратган. Иноуэнинг зарбасидан сўнг Доэни жангни давом эттиролмаслиги маълум бўлганди.
Изоҳ (0)