Сурияда ҳокимиятни қўлга олган “Ҳайъат Таҳрир аш-Шом” (ҲТШ) сиёсий бюроси аъзоси Камол Лабабидий сўнгги кунларда Россия Сурия пойтахти Дамашқ атрофларидан камида 400 нафар ҳарбий хизматчини Хмеймим авиабазасига кўчиргани ҳақида хабар берди.
Лабабидийга кўра, Россия қўшинларининг олиб чиқилиши Суриянинг янги ҳукумати билан келишилган ҳолда амалга оширилган. Бу Сурия армиясининг Дамашқ яқинидаги Қудсаеда жойлашган тўртинчи дивизияси штаб-квартирасида аввалроқ жойлаштирилган россиялик ҳарбийлар ва Россиянинг Дамашқдаги элчихонасида хизмат қилган ҳарбий хизматчиларни ўз ичига олади.
FТ нашри томонидан кўриб чиқилган видеотасвирда 100 га яқин ҳарбий транспорт воситалари колоннаси, жумладан, зирҳли машиналар, юк машиналари, ёнилғи ташувчи цистерналар ва кўчма тиббий бўлинмалар акс этган.
Лабабидийнинг таъкидлашича, Хмеймим базасидан ҳарбийлар самолётлар орқали Россияга олиб кетилган. Унинг сўзларига кўра, ҳозирги вақтда Сурияда ҳокимиятни эгаллаб олган қўзғолончиларнинг қароргоҳига айланган Дамашқдаги Four Seasons меҳмонхонасида Россия ҳарбийларини мамлакатнинг бошқа ҳудудларидан эвакуация қилиш бўйича музокаралар давом этмоқда.
Россия ТИВнинг аниқлик киритишича, “Россия, шунингдек, ўз дипломатик ваколатхоналари ходимларининг бир қисмини ва Беларусь, Шимолий Корея ва Абхазия дипломатик ваколатхоналари ходимларини Дамашқдан олиб чиққан”.
“15 декабрь куни Россия Мудофаа вазирлиги Ҳарбий ҳаво кучларининг махсус рейси билан Хмеймим авиабазасидан Дамашқдаги Россия ташқи ваколатхоналари ходимларининг бир қисми Чкаловский аэропортига олиб чиқилди. Беларусь, Шимолий Корея ва Абхазия дипломатик ваколатхоналари ходимлари ҳам эвакуация қилинди”, дейилади хабарда.
Эвакуация сабаблари айтилмаган, бироқ хабарда Россиянинг Дамашқдаги элчихонаси ўз ишини давом эттираётгани таъкидланган.
Изоҳ (0)