Марк Жулиан Трейнор Янги Зеландиянинг, Иван Орлич Босния ва Герцеговинанинг, Росалба Ло Буе Антико Венесуэланинг Ўзбекистондаги элчиси этиб тайинланди. Бу ҳақда ташқи ишлар вазири Бахтиёр Саидов маълум қилди.
Маълум қилинишича, Янги Зеландиянинг Ўзбекистондаги элчиси этиб тайинланган Марк Жулиан Трейнор билан учрашувда барқарор қишлоқ хўжалиги, саноатни ривожлантириш, “яшил” иқтисодиёт, тадбиркорлар ўртасидаги ҳамкорлик ва бошқа истиқболли йўналишларга эътибор қаратилган.
Шунингдек, Бахтиёр Саидов Босния ва Герцеговинанинг Ўзбекистондаги биринчи элчиси Иван Орличдан ишонч ёрлиқларини қабул қилган.
“Мамлакатларимиз ўртасидаги алоқаларни янада жадал ривожлантиришга бўлган самимий интилишни қадрлаймиз. Дарҳақиқат, ҳам икки томонлама, ҳам кўп томонлама, айниқса, иқтисодий соҳада самарали ҳамкорлик қилиш учун кўплаб имкониятларни кўрмоқдамиз”, деб ёзади вазир.
Бахтиёр Саидов Венесуэланинг Ўзбекистондаги элчиси Росалба Ло Буе Антико билан ҳам учрашув ўтказди. Маълум қилинишича, географик жойлашув жиҳатдан узоқ масофага қарамай мамлакатларни бир-бирига яқинлаштириш учун алоқаларни боғлашга қаратилган кўприклар барпо этишга келишиб олинган.
“Янги қўшма лойиҳалар ишлаб чиқиш ва амалга ошириш, парламентлараро ҳамкорликка кўмаклашиш, билим алмашинувини қўллаб-қувватлаш ва бошқа масалалар юзасидан батафсил фикр алмашдик”, деб ёзади Саидов.
Изоҳ (0)