“Тоттенҳэм” ва “Ньюкасл” қишдаги трансфер ойнасида Лига 1 нинг ёрқин юлдузи, “Ланс” марказий ҳимоячиси Абдуқодир Ҳусанов билан шартнома имзолаш учун ҳаракат қилмоқда. Бу ҳақда Telegraph нашри маълум қилди.
Нашрнинг айтишича, Парижнинг “ПСЖ” клуби ҳам ўзбекистонлик футболчини ўз таркибига қўшиш ҳақида ўйлаётган бир пайтда Англия Премьер Лигасининг етти жамоаси Ҳусановга қизиқиш билдирмоқда. У жорий мавсумда жамоасининг 13 та учрашувидан 9 тасида асосий таркибда майдонга тушган.
“Франция клуби футболчини сотиш орқали катта фойда олиши мумкин. Яқин кунларда бошланувчи трансфер бозорида Ҳусановнинг нархи 25 миллион фунтдан ошиши кутилмоқда. Британиялик мураббий Уилл Стилл Ҳусановга жорий мавсумда катта эътибор қаратиб келмоқда. Ҳусанов марказий ҳимоя позициясида ўйнашдан ташқари, таянч ярим ҳимоячи сифатида ҳам ҳаракат қила олади”, дейилади хабарда.
"Тоттенҳэм" январь ойида марказий ҳимоячи сотиб олиш масаласини кўриб чиқиши мумкин. Охирги ҳафталарда Криштиан Ромеро ва Мики ван де Вен жароҳати сабаб асосий таркибда ҳимоячилар билан боғлиқ муаммолар юзага чиқди. Жамоа “Манчестер Сити”ни 4:0 ҳисобида мағлуб этган учрашувда Бен Дэвис марказий ҳимоя позициясига ўтказилиб, Раду Драгусин билан тандем ҳосил қилди.
“Ньюкасл” ҳам Ҳусановни кузатиб, уни Франция футболидан Премьер Лигага ўтишга тайёр ёш истеъдод сифатида баҳоламоқда.
Аввалроқ Абдуқодир Ҳусанов Франция чемпионатида октябрь ойининг “Энг яхши ёш футболчиси” деб топилганди.
Ҳусанов ёш бўлишига қарамай, Ўзбекистон терма жамоасининг ҳам асосий таркибидан муқим жой эгаллади. у ҳозиргача 18 учрашувда миллий жамоа шарафини ҳимоя қилди.
Изоҳ (0)