“Tottenhem” va “Nyukasl” qishdagi transfer oynasida Liga 1 ning yorqin yulduzi, “Lans” markaziy himoyachisi Abduqodir Husanov bilan shartnoma imzolash uchun harakat qilmoqda. Bu haqda Telegraph nashri ma’lum qildi.
Nashrning aytishicha, Parijning “PSJ” klubi ham o‘zbekistonlik futbolchini o‘z tarkibiga qo‘shish haqida o‘ylayotgan bir paytda Angliya Premyer Ligasining yetti jamoasi Husanovga qiziqish bildirmoqda. U joriy mavsumda jamoasining 13 ta uchrashuvidan 9 tasida asosiy tarkibda maydonga tushgan.
“Fransiya klubi futbolchini sotish orqali katta foyda olishi mumkin. Yaqin kunlarda boshlanuvchi transfer bozorida Husanovning narxi 25 million funtdan oshishi kutilmoqda. Britaniyalik murabbiy Uill Still Husanovga joriy mavsumda katta e’tibor qaratib kelmoqda. Husanov markaziy himoya pozitsiyasida o‘ynashdan tashqari, tayanch yarim himoyachi sifatida ham harakat qila oladi”, deyiladi xabarda.
"Tottenhem" yanvar oyida markaziy himoyachi sotib olish masalasini ko‘rib chiqishi mumkin. Oxirgi haftalarda Krishtian Romero va Miki van de Ven jarohati sabab asosiy tarkibda himoyachilar bilan bog‘liq muammolar yuzaga chiqdi. Jamoa “Manchester Siti”ni 4:0 hisobida mag‘lub etgan uchrashuvda Ben Devis markaziy himoya pozitsiyasiga o‘tkazilib, Radu Dragusin bilan tandem hosil qildi.
“Nyukasl” ham Husanovni kuzatib, uni Fransiya futbolidan Premyer Ligaga o‘tishga tayyor yosh iste’dod sifatida baholamoqda.
Avvalroq Abduqodir Husanov Fransiya chempionatida oktyabr oyining “Eng yaxshi yosh futbolchisi” deb topilgandi.
Husanov yosh bo‘lishiga qaramay, O‘zbekiston terma jamoasining ham asosiy tarkibidan muqim joy egalladi. u hozirgacha 18 uchrashuvda milliy jamoa sharafini himoya qildi.
Izoh (0)