Филиппин президенти кичик Фердинанд Маркос мамлакатнинг эксклюзив иқтисодий зонасида Россия сувости кемаси пайдо бўлишидан хавотир билдирди.
Унинг сўзларига кўра, “Ғарбий Филиппин денгизига бостириб кириш катта ташвиш уйғотади”. Ғарбий Филиппин денгизи Жанубий Хитой денгизининг Филиппиннинг эксклюзив иқтисодий зонасига киритилган қисмини англатади.
Ҳарбий маълумотларга кўра, Россиянинг УФА 490 сувости кемаси 28 ноябрь куни Ғарбий Миндоро провинциясидан 80 денгиз мили ғарбда аниқланган. Филиппин денгиз флоти вазиятни кузатиш учун зудлик билан махсус кучларини жўнатган.
Филиппин томони сувости кемаси билан радио алоқасини ўрнатганида экипаж Владивостокга жўнаб кетиш олдидан об-ҳаво шароити яхшиланишини кутаётганини айтган. Филиппин ҳарбийлари халқаро денгиз қонунчилигига тўлиқ риоя қилган ҳолда мамлакат суверенитетини ҳимоя қилиш бўйича ўз мажбуриятларини бажаришда давом этишини қайд этган.
Россия сувости кемаси билан боғлиқ ҳодиса Жанубий Хитой денгизида Манила ва Пекин ўртасидаги зиддият кучайган бир пайтда юз берди.
Маркос маъмурияти Хитойнинг Жанубий Хитой денгизидаги сувларни назорат қилиш ҳақидаги даъволарига қарши чиқишда давом этмоқда. Қўшма Штатлар, ўз навбатида, Филиппин ҳарбий иттифоқчиларини ушбу стратегик муҳим минтақада суверенитетни ҳимоя қилиш бўйича операцияларида қўллаб-қувватлашини билдирган.
Аввалроқ Хитой Мудофаа вазирлиги расмий вакили У Сян АҚШнинг Typhon ўрта масофали ракета тизимини Филиппиндан дарҳол олиб чиқишга чақирган эди.
Сян шу тариқа Филиппин мазкур ракета тизимини харид қилиш имкониятини кўриб чиқаётгани ҳақидаги хабарларга муносабат билдирди. У бунга бир неча бор қатъий норозилик билдирилганини эслатган. Typhonни “ҳужум қуроли” деб атаган Сян, Филиппиннинг Америка ракеталарини жойлаштиришга розилиги бевосита геосиёсий қарама-қаршиликни келтириб чиқариши ва минтақадаги вазиятни кескинлаштиришини таъкидлаган.
Хитой расмийси бу Филиппиннинг шахсий иши эмаслиги, чунки бу минтақанинг барча мамлакатлари хавфсизлигига дахлдорлигини айтди.
Изоҳ (0)