Россия полицияси 6 июнь куни мамлакат ичида разведка маълумотларини тўплашда гумонланган франциялик тадқиқотчини қўлга олди. Бу ҳақда Россия маҳаллий нашрларига таяниб, Reuters манбаси хабар берди.
Манбада айтилишича, Швейцарияда жойлашган “Гуманитар мулоқот маркази” нотижорат ташкилотининг Россия ва Евросиё бўйича маслаҳатчи бўлиб ишлаган 47 ёшли Лоран Винате ҳибсга олинган. Москвадаги ҳукумат уни россиялик ҳарбийлар ҳақида маълумот йиғишда айблаган.
“Гуманитар мулоқот маркази” нотижорат ташкилоти тадқиқотчининг ҳибсга олинганини тасдиқлаган. Айни пайтда ташкилот олимнинг Франция ҳукумати учун ишлаганини рад этган.
Россия Давлат тергов қўмитаси француз олимини бир неча йил давомида Россия Федерациясининг ҳарбий ва ҳарбий-техник фаолияти соҳасида давлат хавфсизлигига қарши ишлатилиши мумкин бўлган маълумотларни тўплаб келганликда айблаган. У шу айблов бўйича 5 йилга озодликдан маҳрум қилиниши мумкин.
Тадқиқотчи ҳибсга олиниши билан боғлиқ ҳодиса ҳақида Франция президенти Эммануэл Макрон ҳам муносабат билдирган. Макрон ҳодисани Россия ташвиқотининг намунаси деб таърифлаган. У ,шунингдек, ҳибсга олинган тадқиқотчи БМТнинг собиқ Бош котиби Кофи Аннан томонидан асос солинган, дипломатия ва муҳокама ишлари билан шуғулланувчи Швейцария нодавлат ташкилотида ишлаганини, ҳукуматнинг разведка фаолияти билан ҳеч қандай алоқаси йўқлигини маълум қилган.
Франция расмийлари Лоран Винатенинг озод қилиниши учун ҳаракат қилишларини билдиришган. Ҳар қандай ҳолатда ҳам Винате Франция учун ишламагани таъкидланган.
Лоран Винате 1999 йилдан буён Испания, Филиппин ва Ливия каби мамлакатларда мулоқот ва воситачилик орқали қуролли можароларнинг олдини олиш, юмшатиш ва ҳал қилишга ёрдам бериш дастурларида ишлаган. У, шунингдек, Швейцарияда жойлашган “Гуманитар мулоқот маркази” нотижорат ташкилотининг Россия ва Евросиё бўйича маслаҳатчиси сифатида 10 йилга яқин ишлаган.
Олим чечен диаспораси бўйича докторлик диссертациясини тамомлаган ва Европанинг турли университетларида халқаро муносабатлар ва сиёсий иқтисод бўйича маърузалар қилган. У Россия, Кавказ ва Марказий Осиё бўйича бир қанча китоблар ва китоб бўлимлари муаллифи ҳисобланади.
Изоҳ (0)