Ўзбекистоннинг биринчи борти Остонага бориб қўнди. Шавкат Мирзиёевни Қозоғистон бош вазири Алихан Смаилов кутиб олди.
Мамлакат етакчиси Осиёда ҳамкорлик ва ишонч чоралари бўйича кенгаш ҳамда Мустақил Давлатлар Ҳамдўстлиги давлат раҳбарлари кенгаши саммитларида нутқ сўзлаши кутилмоқда.
Шунингдек, ҳамкор мамлакатлар делегациялари раҳбарлари билан икки ва кўп томонлама учрашув ҳамда музокаралар ўтказади.
Аввалроқ Шавкат Мирзиёев Қозоғистон президенти Қосим-Жўмарт Тўқаевнинг таклифига биноан 12 октябрь куни Остона шаҳрига жўнаб кетгани ҳақида хабар берилганди.
Президент у ерда Осиёда ҳамкорлик ва ишонч чоралари бўйича кенгаш ҳамда Мустақил Давлатлар Ҳамдўстлиги давлат раҳбарлари кенгашининг навбатдаги мажлисларида иштирок этади. Ушбу саммитлар доирасида ҳамкор мамлакатлар делегациялари раҳбарлари билан икки томонлама учрашувлар ўтказиш ҳам режалаштирилган.
Таъкидланишича, Осиёда ҳамкорлик ва ишонч чоралари бўйича кенгаш саммити — минтақа мамлакатлари ўртасида «мулоқот форуми» сифатида танилган. Унинг асосий мақсади Осиёда тинчлик, хавфсизлик ва барқарорликни таъминлаш бўйича ҳамкорликни кенгайтириш, гиёҳвандлик воситаларининг ноқонуний ишлаб чиқарилиши ва айланишига қарши курашиш, савдо-иқтисодий ҳамкорликни кенгайтиришдан иборат.
Кимлар қатнашмоқда?
Бу саммит Осиё минтақасининг деярли барча давлат ёки ҳукумат раҳбарлари иштирок этаётгани инобатга олинса, халқаро ҳамкорликни кенгайтириш бўйича ноёб мулоқот майдони ҳисобланади. Бугунга қадар 51 та делегация раҳбарлари саммитда иштирок этишини тасдиқлаган. Уларнинг 12 нафари давлат раҳбарларидир.
Хусусан, Ўзбекистон, Туркия, Озарбайжон, Россия, Ироқ, Эрон, Қатар, Фаластин каби мамлакатлар президентлари саммитда қатнашади. Марказий Осиё минтақасидан эса фақатгина Афғонистон иштирок этмаяпти.
Саммитнинг асосий принциплари
Суверен тенглик ва суверен ҳуқуқларни ҳурмат қилиш, низоларни тинч йўл билан ҳал қилиш, иқтисодий, ижтимоий ва маданий ҳамкорлик, давлатларнинг ички ишларига аралашмаслик, куч ишлатмаслик ёки куч ишлатиш билан таҳдид қилмаслик, давлатларнинг ҳудудий яхлитлиги, қуролсизланиш ва қуролларни назорат қилиш, инсон ҳуқуқлари ва асосий эркинликларини ҳурмат қилишдан иборат.
Осиёда ҳамкорлик ва ишонч чоралари бўйича кенгашига қайси мамлакатлар аъзо?
Кенгашнинг доимий аъзолари: Ўзбекистон, Озарбайжон, Афғонистон, Баҳрайн, Бангладеш, Вьетнам, Миср, Исроил, Ҳиндистон, Иордания, Ироқ, Эрон, Қозоғистон, Қатар, Камбоджа, Хитой, Жанубий Корея, Қирғизистон, Мўғулистон, БАА, Покистон, Фаластин, Россия, Тожикистон, Таиланд, Туркия, Шри-Ланка.
Кенгашда кузатувчи мақомидаги мамлакатлар: Беларусь, Индонезия, Малайзия, АҚШ, Украина, Филиппин, Япония, Лаос ва Туркманистон.
Изоҳ (0)