Таҳлилларга кўра, 2023 йилда Бухорода жами 1 миллион 387 минг нафар хорижий сайёҳ оқими кузатилган. Жорий йил январь апрель ойларида вилоятга хориждан 455 минг 220 нафар сайёҳ ташриф буюрган. Вилоят иқтисодига хорижий сайёҳлар ташрифидан 2023 йилда 339,1 миллион АҚШ доллари тушум қайд этилган бўлса, бу кўрсаткич жорий йил 4 ойида 113,8 миллион АҚШ доллари қийматидан ошди. Вилоятимиз сайёҳлик тизими ривожида зиёрат туризми алоҳида ўрин тутмоқда.
Зиёрат туризми йўналишида қадим ва ҳамиша навқирон Бухорои шарифга ташриф буюраётган сайёҳлар сони кейинги етти йилда қарийб 12 бараварга кўпайгани қувонарли, албатта. Кўҳна заминнинг зиёрат туризмига доир салоҳияти Индонезия, Малайзия, Сингапур, Туркия, Брлашган Араб Амирликлари, Эрон давлатлари, шунингдек, Мустақил Давлатлар Ҳамдўстлигидаги Россия Федерацияси, Озарбайжон, Қозоғистон, Қирғизистон, Тожикистон каби республикалар вакиллари томонидан эътироф этилмоқда.
Мазкур йўналишда халқаро ҳамкорликни янада кучайтириш, йирик компания ва ташкилотлар билан музокаралар олиб бориш мақсадида Бухоро вилояти ҳокимининг туризм, маданият, маданий мерос ва оммавий коммуникациялар масалалари бўйича ўринбосари Ботиржон Шаҳриёров бошчилигадаги делегация “Halal In Travel — Global Summit-2024” халқаро анжуманида қатнашиш мақсадида Сингапур давлатида бўлди.
Сингапурнинг “Crescent Rating” халқаро ташкилоти томонидан 30 май куни ўтказилган мазкур умумжаҳон саммитида 30 га яқин давлатнинг 80 нафардан кўпроқ вакили қатнашди. Халқаро анжуманнинг “Мусулмон зиёратчиларни Ислом меросига қайтариш” мавзусига бағишланган музокарлар ва тақдирлаш маросимида қатнашувчиларга Ўзбекистонда туризм, хусусан, зиёрат туризми йўналишидаги муҳим ижобий ўзгаришлар тақдимот қилинди.
Шу ўринда, нуфузли “Crescent Rating” ташкилоти фаолияти хусусида тўхталиб ўцак, унга 2008 йилда Сингапурда ишбилармон Фазал Баҳарддин томонидан асос солинган бўлиб, ҳалол саёҳатлар тадқиқотларига бағишланган ташкилот ҳисобланади. Унда олиб бориладиган тадқиқот ва таҳлиллар натижасида ҳар йили халқаро рейтинглар эълон қилинади.
Компания фаолияти мазмуни сифатида туризм соҳасида мусулмон саёҳатчилар учун яшаш шароитларини яхшилаш зарурлигини эътироф этади. 2015 йилда компания “Halal Trip ва Мuslim Travel Warehouse” каби онлайн платформаларни жорий этиш орқали хизматларини кенгайтирган.
2011-2014 йилларда “Crescent Rating” ҳар йили мусулмон саёҳатчилар учун турар жой даражасига кўра мамлакатлар рейтингини эълон қилиб борди. Ушбу лойиҳа 2015 йилда “Mastercard” билан ҳамкорлик қилиб, “Глобал мусулмон саёҳатлари индекси”га айланди.
2013 йил август ойида “Crescent Rating” мусулмонларни намоз вақтлари ва шу билан боғлиқ бошқа маълумотлардан хабардор қилишга мўлжалланган “Crescent Trips” мобил иловасини ишга туширди.
2013 йил декабрь ойида “Crescent Rating” мусулмон саёҳатчилар учун “Halal Trip.cоm” веб-сайтини тақдим этди. Унда “ҳалол” ёрлиғига муносиб ресторанлар халқаро маълумотномаси мавжуд. Кейинчалик 2015 йилда “Crescent Rating” компанияси “Halal Trip.соm” веб сайти учун мобил иловани ҳам ишлаб чиқди. Умуман, мазкур компания мусулмон саёҳат бозори салоҳиятини 2028 йилга бориб 225 миллиард АҚШ долларига етишини башорат қилмоқда.
Сигапурда юқори даражада ташкиллаштирилган “Halal In Travel—Clobal Summit-2024” умумжаҳон анжуманига қайтсак, унда Бухоро вилояти ҳокимининг ўринбосари Ботиржон Шаҳриёров асосий маърузачи сифатида иштирок этди.
Нотиқ ўз чиқишида жумладан, мамлакатимиздаги исломий мерос иншоотларига оид батафсил маълумотлар билан ўртоқлашиб, жумладан Имом Ал Бухорий мероси, Етти Пир туркумига мансуб муқаддас қадамжолар, Баҳоуддин Нақшбанд силсиласи ва бошқалар ҳамда бу зиёратгоҳларнинг мусулмон сайёҳатчилари учун аҳамиятли бўлган омиллари ва яратилган қулайликлар ҳақида батафсил тўхталди.
Ислом дини, Қуръони Карим ва Ҳадис илмининг асл мазмун-моҳиятини, ҳадисшунослик мактабининг илмий-маънавий асосларини, шу заминдан етишиб чиққан Имом Бухорий, Имом Термизий сингари буюк ҳадисшунос алломалар меросини ҳар томонлама ўрганиш, уларни кенг тарғиб ва ташвиқ қилиш борасида олиб борилаётган саъй-ҳаракат алоҳида эътироф этилди.
Шу нуқтаи назардан, Ўзбекистон ҳукумати томонидан юртимизда зиёрат туризми салоҳиятини янада ривожлантириш ва ундан фойдаланиш самарадорлигини ошириш, хорижлик сайёҳларни ҳудуднинг ноёб тарихий-маданий ва меъморий мероси билан яқиндан таништириш борасидаги амалий ишлар хусусида сўз борди.
Қолаверса, мамлакатимизда туризм салоҳиятини зиёрат йўналишида янада кенгайтириш имкониятлари ҳақида “Crescent Rating & Halal Trip” ташкилоти асосчиси Фазал Бахарддин томонидан ташкиллаштирилган “Мусулмон зиёратчиларни Ислом меросига қайтариш” мавзусига бағишланган давра суҳбатида Бухоро вилоятининг туризм, жумладан, зиёрат туризми йўналишидаги ютуқлари кўпларнинг қизиқишига сазовор бўлди.
Ўз навбатида, Фазал Бахарддин томонидан Ўзбекистон Республикаси зиёрат туризми бозорининг турли сегментларига йўналтирилган туризм маҳсулоти ва хизматларини диверсификация қилаётгани, уларнинг рақобатбардошлигини янада оширишга, мақбул ва қулай ички ва халқаро зиёрат туризми муҳитини яратишга, туризм маҳсулотларини кенг тарғиб қилишга, шунингдек, мамлакатдаги саёҳат ва дам олиш учун хавфсиз манзил сифатидаги имижини мустаҳкамлаш мақсадида олиб бораётган ижобий ишларини алоҳида таъкидлади ҳамда томонидан расмий тақдирлаш жараёнига старт берди.
Мазкур маросимда Бухоро шаҳрининг умумбашарий бой Ислом меросини намойиш этишга доир доимий саъй-ҳаракатлари, йилнинг Ислом мероси йўналишида саёҳатчи нуқтаи назаридан юқори даражадаги Ислом тарихий маданиятига эга эканлигини эътироф этилган ҳолда “Бухоро шаҳри—йилнинг Ислом мероси манзили” номли мукофоти ва сертификати билан тақдирланди.
Шу муносабат билан умумжаҳон анжуманида Ўзбекистон Республикасида туризм соҳасини жадал ривожлантиришга қаратилган ислоҳотлар самарадорлиги юқори баҳолаган ҳолда бу йилги “Halal In Travel—Global Summit-2024” мукофоти Бухоро вилоятига топширилди.
Жаноб Фазал Бахарддин ўз чиқишида янгиланган рейтингни шакиллантиришда ва Ўзбекистон томони ушбу нуфузли мукофотга совриндор бўлишига қатор омиллар муҳим аҳамиятга эга бўлганини таъкидлади.
Бунда аввало давлат очиқлиги, виза талаблари, транспорт ва инфраструктура қулайлиги, шунингдек, коммуникациялар мавжудлиги, мақсадли маркетинг, мулоқот қобилияти, манфаатдор томонларнинг хабардорлиги, қолаверса, муҳит жозибадорлиги, бунда хавфсизлик ва ташриф буюрувчиларга турар жой ва бошқа қулайликлар яратилгани, асосий сайёҳлик хизматлари, ноёб халқаро тажриба ва янгиликлар жорий қилинаётгани каби жиҳатларга тўхталиб ўтилди.
Халқаро ташкилот асосчиси Фазал Бахарддин юқоридаги омилларни ва юртимизда амалга оширилаётган изчил ислоҳотларни инобатга олиб, халқаро рейтингда Ўзбекистон Республикаси 2021 йилга нисбатан 7-ўринга кўтарилганини ва 2022 йил учун янгиланган рейтингда умумий 9-ўринни эгаллаб, Сингапур ҳамда Баҳрейн давлатлари қаторида топ, яъни халқаро рейтинги юқори ҳисобланган пешқадам 10 та давлат рўйхатидан ўрин олганлигини мамнуният билан қайд этди.
Бундан ташқари, Сингапурдаги хизмат сафари ва халқаро нуфузли анжуман жараёнида Ботиржон Шахриёров бошчилигидаги Бухоро вилояти делегацияси Ўзбекистон Республикасининг Сингапурдаги фавқулодда ва мухтор элчиси Алишер Қаюмов билан ҳамкорликда бир қатор хорижий ташкилот ва компаниялар раҳбарлари билан ўзаро музокаралар олиб борди.Жумладан, “Pacific Аsia Travel”—Тинч Океани Осиё саёҳатлар уюшмаси элчиси, жаноб Сон Хва Вонг, Филиппин туризм департаменти котиби муовини Мйра Паз Валдеросса, Ислом туризм маркази бош директори, жаноб Низран Нурдин, Жанубий-Шарқий Осиёда мурожаатлар билан ишлаш маркази висе-президенти Аиша Ислом, “Silk Road Fund CО.LTD”—Ипак йўли жамғармаси президентининг кенгаш аъзоси Чаи Хуэжин, Сингапур мусаввирлари ва тижорат уюшмаси бош менеджери Меҳрибан Эсин Арслан сингари ўнга яқин компания мутасаддилари серқуёш мамлакатимизнинг кўҳна ва ҳамиша навқирон Бухоро шаҳри ва унинг бугунги сайёҳлик салоҳияти, мавжуд имкониятлар ҳақида қизиқиш билдиришди. Самимий ва дўстона руҳда кечган мулоқотларда келгусидаги ўзаро манфаатли ҳамкорликни ривожлантиришга доир ҳамкорлик масалалари келишиб олинди.
Изоҳ (0)