Президент фармонига кўра, 2025 йил 1 январдан бошлаб тергов судьяси лавозими жорий этилади.
Жиноят ишлари бўйича туман, шаҳар судларида фаолият бошлаши кутилаётган тергов судьяларига судга қадар иш юритув даврида процессуал қарорларга санкция бериш ва маъмурий ҳуқуқбузарликлар тўғрисидаги ишларни кўриб чиқиш ваколатини берилмоқда.
Фармон билан Судьялар олий кенгаши Олий суд билан биргаликда 2025 йил 1 январга қадар тергов судьяси лавозими жорий этиладиган судларнинг юқори малакали ва масъулиятли кадрлар билан тўлдирилиши таъминлаш белгиланган.
“Дарё” сўровига жавобан Судьялар олий кенгаши матбуот котиби Турсунали Акбаров айни кунларда тергов судьялари лавозимларига тайинловлар амалга оширилаётганини тасдиқлади. Унга кўра, фармон талабларидан келиб чиқиб, Судьялар олий кенгаши томонидан белгиланган тартибда тергов судьяси лавозимига номзодларни танлаш ва тайинлашга доир очиқ танловлар ўтказилиб, тегишли тайинловлар амалга оширилмоқда.
Маҳкама матбуот котибининг таъкидлашича, тергов судьяси лавозимига тайинлаш тўғрисидаги кенгаш қарорлари 2025 йилнинг 1 январидан кучга киради. Унгача тайинланган тергов судьялари аввалги лавозимида фаолиятини давом эттиради.
Очиқ танлов ва муқобиллик асосидаги ўтаётган танловларнинг умумий якунлари бўйича қўшимча ахборот берилиши маълум қилинди.
Изоҳ (0)