Prezident farmoniga ko‘ra, 2025-yil 1-yanvardan boshlab tergov sudyasi lavozimi joriy etiladi.
Jinoyat ishlari bo‘yicha tuman, shahar sudlarida faoliyat boshlashi kutilayotgan tergov sudyalariga sudga qadar ish yurituv davrida protsessual qarorlarga sanksiya berish va maʼmuriy huquqbuzarliklar to‘g‘risidagi ishlarni ko‘rib chiqish vakolatini berilmoqda.
Farmon bilan Sudyalar oliy kengashi Oliy sud bilan birgalikda 2025-yil 1-yanvarga qadar tergov sudyasi lavozimi joriy etiladigan sudlarning yuqori malakali va masʼuliyatli kadrlar bilan to‘ldirilishi taʼminlash belgilangan.
“Daryo” so‘roviga javoban Sudyalar oliy kengashi matbuot kotibi Tursunali Akbarov ayni kunlarda tergov sudyalari lavozimlariga tayinlovlar amalga oshirilayotganini tasdiqladi. Unga ko‘ra, farmon talablaridan kelib chiqib, Sudyalar oliy kengashi tomonidan belgilangan tartibda tergov sudyasi lavozimiga nomzodlarni tanlash va tayinlashga doir ochiq tanlovlar o‘tkazilib, tegishli tayinlovlar amalga oshirilmoqda.
Mahkama matbuot kotibining taʼkidlashicha, tergov sudyasi lavozimiga tayinlash to‘g‘risidagi kengash qarorlari 2025-yilning 1-yanvaridan kuchga kiradi. Ungacha tayinlangan tergov sudyalari avvalgi lavozimida faoliyatini davom ettiradi.
Ochiq tanlov va muqobillik asosidagi o‘tayotgan tanlovlarning umumiy yakunlari bo‘yicha qo‘shimcha axborot berilishi maʼlum qilindi.
Izoh (0)