Ўзбекистон футбол ассоциацияси (ЎФА) ҳисобчиси 350 минг АҚШ долларни (тахминан 4 миллиард сўм) ўзлаштириб, Туркияга учиб кетгани айтилмоқда. Бу ҳақда “Championat Asia” нашри хабар берди.
“Дарё”нинг ЎФАдаги манбасига кўра, айни пайтда ҳолат ўрганилмоқда. “Ташкилот ҳисоб-китобларида камомад чиққани ҳақиқат, бироқ ҳозирча ҳисобчи қанчадир маблағни ўзлаштириб, чет элга қочиб кетди, дея ҳукм чиқаришга эрта. Суриштирувлар давом этяпти”, — дейди манба.
Бош прокуратура ахборот хизмати раҳбари Ҳаёт Шамсиддинов бу ҳақдаги маълумотга эга эмаслигини билдирди.
Аввалроқ “Халқ банки” АТБ Косонсой туман филиали иш бошқарувчиси касса омборидан 137 минг АҚШ доллари ва 1,2 миллиард сўм пулни талон-торож қилиб, Қирғизистонга қочиб кетгани тўғрисида хабар берилганди. 19 август куни у Қирғизистонда ушланиб, 2024 йил 16 январь куни Ўзбекистонга олиб келинган.
Изоҳ (0)