ДХХ ходимлари томонидан судья, бош ҳисобчи, бош инспектор, бош муҳандис ўринбосари пора олаётганида ушланди.
Маълум қилинишича, “Ҳудудий электр тармоқлари” Қашқадарё филиали бош муҳандиси ўринбосари пахта-тўқимачилик кластерига тегишли бўлган 21 та сув насос қудуқларини электр тармоқларига улаш учун “техник шарт” бериш эвазига 7 минг доллари талаб қилиб, январь ойида 3 минг доллар олган.
Давлат хавфсизлик хизматининг Қашқадарё вилояти бўйича бошқармаси ходимлари томонидан Бош прокуратура ҳузуридаги департамент билан ҳамкорликда ўтказилган тезкор тадбирда, бош муҳандис ўринбосари қолган 4 минг долларни олган вақтида ашёвий далиллар билан ушланган.
Мазкур мансабдор шахс муқаддам Жиноят кодексининг 205 (ҳокимият ёки мансаб ваколатини суиистеъмол қилиш) ва 209-моддалари (мансаб сохтакорлиги) билан судланган.
Жиззах вилояти “Тоза ҳудуд” ДУК бош ҳисобчиси улгуржи савдо билан шуғулланувчи масъулияти чекланган жамият раҳбарига нисбатан судда кўрилаётган жиноят ишини танишлари орқали унинг фойдасига ҳал қилиб бериш, яъни озодликдан маҳрум қилиш билан боғлиқ бўлмаган жазо тайинлатиб бериш эвазига 15 минг доллар талаб қилиб, олдиндан 5 минг доллар олган вақтида Давлат хавфсизлик хизмати ва департаменти ходимлари томонидан ушланган.
Ўзбекистон Ҳакамлик судлари ассоциациясининг Навоий вилоят ваколатхонаси ҳузуридаги доимий фаолият кўрсатувчи ҳакамлик суди судьяси ўз хизмат мавқейидан фойдаланиб, Нурота туманида яшовчи фуқаронинг муқаддам бухоролик харидорларга сотган 250 бош қўйларининг пуллари берилмаётгани юзасидан қилган мурожаатини ижобий ҳал этиб бериш эвазига 1 000 доллар талаб қилган.
Давлат хавфсизлик хизмати ва департамент ходимлари томонидан ўтказилган тезкор тадбирда, у сўралган пул маблағи ҳисобидан 500 доллар ва 6 миллион 250 минг сўм олган вақтида ушланган.
Миллий гвардиянинг Сирдарё вилоят Қўриқлаш бошқармаси хизматни ташкил этиш ва мувофиқлаштириш бўлими бош инспектори Боёвут туманида яшовчи фуқарони Қўриқлаш бошқармасига ишга киритиб қўйиш эвазига 3 минг доллар талаб қилиб, муқаддам 1500 доллар олган, лекин у сўралган пулнинг қолган 1500 долларни олган вақтида Давлат хавфсизлик хизматининг Сирдарё вилояти бўйича бошқармаси ва Гулистон ҳарбий прокуратураси ходимлари томонидан ашёвий далиллар билан ушланган.
Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Аввалроқ Нукусда 900 млн сўмлик қурилиш объектини олиб беришни ваъда қилган фуқаро ушланганди. 2023 йил декабрда эса Оқдарё туманининг собиқ ҳокими тадбиркордан 200 минг доллар олаётганда қўлга тушган эди.
Изоҳ (0)