Фарғона вилояти Олимпия захиралари коллежи бош ҳисобчиси 4,3 миллиард сўмни онлайн-қимор ўйинларига сарфлаб юборгани аниқланди, деб хабар беради Бош прокуратура матбуот хизмати.
Маълум қилинишича, Фарғона вилояти Олимпия захиралари коллежи бош ҳисобчиси эгаллаб турган лавозимидан ғаразли мақсадларда фойдаланиб, 2019—2021 йиллар давомида ўзига асоссиз равишда жами 4 миллиард сўм иш ҳақи ва устама ёзиб олган.
Шунингдек, у коллеж ўқитувчилари номига банк пластик карталари очиб, уларга 310 миллион сўм бюджет маблағларини билдирмасдан ўтказиб олган. Бош ҳисобчи талон-торож қилган жами 4,3 миллиард сўм маблағларни интернет тармоғи орқали қимор ўйинларига тикиб, сарф қилгани аниқланган.
Ҳолат юзасидан бош ҳисобчи ва бошқаларга нисбатан Жиноят кодексининг 167 (ўзлаштириш ёки растрата йўли билан талон-торож қилиш) ва 209 (мансаб сохтакорлиги) моддалари билан жиноят иши қўзғатилган.
Гумонланувчига нисбатан қамоққа олиш эҳтиёт чораси қўлланган. Тергов давом этмоқда.
Эслатиб ўтамиз, 2021 йилда қарзга олган 57 миллион сўмни тотализаторда ютқазиб қўйган ФарДУ ўқитувчиси қабристонда ўзини осиб қўйганди.
Изоҳ (0)