Ижтимоий тармоқларда Жиззах шаҳридаги мактаблардан бирининг бош ҳисобчиси ўз ҳовлисида осилган ҳолда топилгани айтилган хабарлар тарқалди. Жиззах вилояти прокуратураси мазкур ҳолатга муносабат билдириб, бош ҳисобчи билан боғлиқ воқеа 2019 йилда содир бўлганини маълум қилди.
Маълум бўлишича, Жиззах шаҳар халқ таълими бўлимига қарашли 22-сонли ихтисослаштирилган давлат умумтаълим мактабининг (ИДУМ) 2010—2019 йиллардаги молиявий хўжалик фаолияти юзасидан ҳужжатли тафтиш ўтказилган. Тафтиш натижасига кўра, ИДУМ мансабдор шахслари томонидан қарийб 160 миллион сўмлик бюджет маблағлари ўзлаштириш ва растрата қилиш йўли билан талон-торож қилингани ҳолати юзасидан жиноят иши қўзғатилиб, тергов ҳаракатлари ўтказилган.
Хабарда қайд этилган, 22-сонли ИДУМ бош ҳисобчиси О.Тошболтаев 2019 йил 21 ноябрда ўз ҳовлисининг ёрдамчи хонасида осилган ҳолда топилгани ҳолати юзасидан Жиззах шаҳар прокуратураси томонидан терговга қадар текширув ҳаракатлари ўтказилган. Унинг натижасига кўра, фуқаронинг ўлимида бирор-бир шахснинг ҳаракатларида жиноят таркиби бўлмагани сабабли ўша йилнинг 20 декабрида Жиноят-процессуал кодексининг 83-моддаси (реабилитация учун асослар) 2-бандига асосан жиноят иши қўзғатишни рад этиш ҳақида қарор қабул қилинган.
Жиноят ишининг О.Тошболтаевга нисбатан қисми унинг вафот этгани сабабли 2020 йил 30 июнда Жиноят-процессуал кодексининг 84-моддаси (айблилик тўғрисидаги масалани ҳал қилмай туриб жиноят ишини тугатиш учун асослар) 1-қисми 3-бандига асосан ҳаракатдан тугатилган.
Жиноят ишининг 22-сонли ИДУМ директори Д.Садриддиновани айблашга доир қисми, унинг биринчи марта унча оғир бўлмаган жиноят содир этгани, айбига тўлиқ иқрорлиги, қилмишидан чин кўнгилдан пушаймон бўлиб, етказилган моддий зарарни тўлиқ қоплагани сабабли унинг айблилик масаласини ҳал қилмасдан туриб тугатилган.
Тергов ҳаракатлари натижасига кўра, 22-сонли ИДУМ директорининг хўжалик ишлари бўйича ўринбосари У.Йўлдошев Жиноят кодексининг 167-моддаси (ўзлаштириш ёки растрата йўли билан талон-торож қилиш) 2-қисми «а, б, в, г» бандлари ва 209-моддаси (мансаб сохтакорлиги) 2-қисми «а» банди билан айбланиб, жиноят иши судга юборилган ва унга нисбатан жиноят ишлари бўйича Жиззах шаҳар судининг 2020 йил 24 сентябрдаги ҳукми билан қонуний жазо чораси тайинланган.
Аввалроқ қарзга олган 57 млн сўмни тотализаторда ютқазиб қўйган ФарДУ ўқитувчиси қабристонда ўзини осиб қўйгани, Андижонда фуқаро уйида ўзини осиб ўлдиргани, Тошкентда раҳбарининг 6 млн сўм пулини тотализаторга тикиб, ютқазиб қўйган йигит ўзини пичоқлагани тўғрисида хабар берилганди.
Изоҳ (0)